Siribana: Diasabra den oranan di mainta polis ta confisca un auto cu un rato prome a hit and run na CITGO Boulevard.
Un SUV tabata para patras den e parkinglot di e gasstation, chauffeur di un Toyota Corolla sin pone bon atencion, a reverse y a dal contra e SUV. E chauffeur di Toyota Corolla no a para pa su responsabilidad, e no a ni baha mira kiko por ta e daño material cu e por a causa na e SUV, ela djes sigui bay direccion di su cas.
Mesora a pidi pa presencia di Polis di trafico, nan a bay na e sitio y a cuminsa cu un investigacion. Durante e investigacion nan a haya sa cu e auto ta para na un cas na Siribana.
Polis a bay na e sitio y enberdad nan a topa cu e auto para dilanti di e cas. Na e sitio polis a controla e auto y a nota cu e auto tin un daño recien riba dje y asina confirmando cu e daño aki ta esun cu a wordo haci na e SUV.
Polis a pita varios biaha pero ningun hende a bin pafo. E agentenan policial a mira un persona medio hala Cortina y cera esaki bek.
E agentenan na e sitio no a sigui perde tempo y a dicidi di confisca e auto. Takelwagen a transporta e Toyota Corolla blanco pa warda di polis, por ta asina e chauffeur of doño di auto lo por sali dilanti pa duna cuenta.