Sombre – Diabierna anochi algo prome cu 11’or, den bario di Sombre por a scucha gritonan fuerte di un criatura sclamando di dolor, pa motibo cu su tata tawata maltratando’e. Un mucha cu no por a defende su mes contra e sutanan cu e tabata ricibiendo for di su tata.
Polis a wordo avisa di e caso serio aki cu tawata tumando lugar e momento ey na un cas na Sombre, e informe tawata un problema di famia den cual un mucha lo tawata wordo bati door di su tata.
E criatura tawata grita hopi duro den oranan laat di anochi, e gritonan sclamando di dolor, sigur mester por a scucha pa mayoria di bisiña, pero asina mes niun hende no a sali na su defensa.
Na yegada polis a papia cu e tata, segun e tata e mucha a falt’e respet y ela pas’e un wanta, pero e tata a nenga cu ela bati e mucha.
Polis a confronta e tata cu e mucha a bisanan cu su tata a maltrat’e y tambe cu e tata a pusha su mama.
Lamentablemente niun detencion a cay, e patruya a bandona e cas lagando e criatura den man di destino.
No a bay ni cu e tata y ni cu e mucha warda di polis pa haya sa kiko tur lo por a pasa cu e mucha.
Mientras e tata tawata bati e mucha, e mama tawata presente pero e no por a haci mucho, kizas elo tawata tin miedo. E tawata bisa e tata Si, pa stop di dal e mucha.
E caso aki lo por consider’e un caso di maltrato di mucha, mirando e forma con e mucha tawata grita y e tata tawata bati’e. E patruya di polis a bandona e adres sin detene niun hende, pero no ta conoci si nan por a notifica instancianan concerni manera Voogdijraad.
Nos ta spera cu despues cu polis a bay for di e cas, e tata no a sigui cu e maltrato, unicamente pa mustra cu ta E ta manda den e cas, manera e tawata expresa su mes na e mucha.