ORANJESTAD, Aruba – Dr. Horacio E. Oduber Hospital a celebra recientemente hubileo di su empleadonan cu entre januari y mei 2019 a celebra aña den servicio. Durante e evento aki a celebra un total di 710 aña di servicio di cual algun a conmemora 12.5 aña, un grupo 25 aña y hasta tabatin empleado cu a cumpli 40 aña di servicio. Esey practicamente ta un bida completo dedica na e cuido di pashent!
“Den un ambiente yena cu alegria, lealtad y colegialidad, Hospital a bini hunto pa celebra hubileo di mas di 30 empleado den ballroom di e prestigioso Hilton Aruba Caribbean Resort & Casino. Hospital a honra cada empleado cu na un manera of otro durante añanan a brinda aporte na cuido di pashent sea directamente of indirectamente,” asina Charlaine Huntington, Manager di Departamento di comunicacion di Hospital a duna di conoce. Un evento asina ta tuma hopi tempo y creatividad mirando cu kier hasi’e personal y a alabes yena cu creatividad y alegria. E parti personal ta e momento cu nan ta haya nan pin sea brons, zilver of oro directamente for di mannan di Director di Cuido di pashent di Hospital, esta sr. Ezzard Cilié y alabes ta dedica un video di colega pa colega unda por conoce nan personalidad y trabou mas di cerca.
“Coleganan, famia y amistad tabata presente na unda a aplaudi, gradici, duna regalo y pasa un momento ameno cu e hubilarionan. Danki di curason na nan pa e tremendo trabou haci durante nan añanan di servicio y sigur ta spera di por sigui conta cu nan pa sigui mehora e calidad di cuido cu nos ta boga pe diariamente. Masha pabien na tur”, asina Charlaine Huntington a termina bisando.
