“E rapport publica mas reciente di Banco Central (CBA) riba resultado di nan Consumer Confidence Survey, ta confirma e sentimiento cu ta bidando den pueblo y cu nos a bin ta scuchando y ta mira den pueblo e ultimo aña aki, e lider di AVP, mr. Mike Eman a expresa na apertura di su conferencia di Prensa.
E cifranan ta confirma cu e perdida di compra, e perdida di confiansa di e consumido, e perdida di confiansa den futuro ta sumamente alarmante na e momentonan aki. Lider di partido AVP, mr Mike Eman a mustra cu den combersacionnan continuo den comunidad, por tende y mira e inkietud y dolor pa aumnento di costo di bida, di prijsnan halto, di perdida di poder di compra, hendenan cu ta perdiendo trabou y ora cu mira e sentimientonan aki bek den e cifranan macro di e estudio mas recien di Banco Central, e ta confirma e dolornan aki di pueblo.
- Mike Eman a enfatisa cu e prome conclusion cu por saca for di e survey di Banco Central bou di consumidonan, ta cu e confiansa di e consumido den e situacion actual, ta sigui deteriora den forma alarmante den e kwartal bou di cual Banco Central a haci su survey nobo.
Aki ta wordo señala cu ta constata un sentimiento sumamente pesimista bou di consumidonan loke a nifica cu di esnan cu a wordo encuesta pa Banco Central, un gran mayoria a bisa cu riba puntonan esencial cu ta afecta nan calidad di bida, nan ta mira e desaroyo actual y e perspectiva pa futuro, den un forma hopi negativo.
“Ora cu mira cifranan di 95.8% por pensa cu tog nos ta na 95%, pero e startnummer den e encuestanan aki di Banco Central pa cu e estadisticanan aki, ta na 90% ta 0 y e ta bay te na 110%, loke a nifica cu te na 100 ainda bo ta riba un cinco pero ora bo ta na 95.8, bo ta diep diep den onvoldoende cu e resultadonan aki.
Tanto con su situacion finaciero ta na e momentonan aki ta negativo y con su perspectiva ta pa futuro ta pesimista. Esta awe ta malo y no ta spera mihor pa mayan. Un situacion hopi doloroso y scur cu nos mester salba nos comunida for di dje, e lider di AVP, mr. Mike Eman a expresa.
Tambe e consumido ta hopi preocupa ora di analysa su reaccion riba desaroyo di prijsnan awor y den futuro, ambos e consumido ta hopi negativo riba dje, mr. Mike Eman ta analysa for di e survey di Banco Central.
E resultado di e encuesta, no por ta otro tampoco, pasobra si mira e cantidad di medida cu e Gobierno aki a introduci den menos di un aña, compaña cu un falta di vision y un maneho cu no ta duna confianza, e caida di poder di compra, di benta den comercio, caida den inversion, tur ta concecuencia di e maneho aki.
“Y AVP a alerta pa e concecuencianan aki ya den nos analisis di e pakete di medida na momento cu a presenta e paketa aki. “Economic monitor’ di Banco Central a mustra caida den crecemento; survey di inflacion di CBS a mustra cu inflacion ta subi dramaticamente: business survey ta bisa cu tin caida den comercio na Aruba; survey di consumidonan awe ta bisa cu tin un caida grandi den experiencia di cada ciudadano con e ta mira su propio finansa, con e ta mira su presupuesto y con e ta premira su situacion ta bay ta den futuro”.
Ta hopi malo caba pa un pais ora cu e ciudadano ta biba cu dolor, ta biba cu retonan diario cu prijsnan ta keda aumenta y no por alcansa cu su presupuesto, e ta bira ainda mas pio ora cu e no tin perspectiva tampoco di kico futuro tin pa tur hende,” e lider di partido AVP, mr. Mike Eman a mustra. “Pesey hunto nos mester salba Aruba di e gobernacion aki” e ta finalisa bisando.