Siman pasa, den Conseho di Minister, Gobierno di Aruba a tuma e decision cu lo bay institui un comision cu ta bay atende cu e futuro di e refineria. E comision a haya e tarea pa den dos luna di tempo evalua e diferente scenario. Di parti di Gobierno, ta mira cu tin tres scenario pa cuminsa cu ne, mientras cu kisas tin tin otro scenario cu lo por surgi.
E prome scenario ta pa evalua kico lo bay pasa cu Citgo. Aruba lo sigui cu Citgo of no lo sigui cu Citgo. Riba e prome scenario aki, Prome Minister Evelyn Wever-Croes ta di opinion cu muy probablemente, lo no sigui cu Citgo. Den e caso aki, e comision mester bin cu conseho kico lo mester wordo haci pa sali for di e contrato sin ningun prolema.
E di dos scenario nos ta haya e situacion na unda cu e decision ta cu no lo sigui cu Citgo, pero si lo sigui cu e refineria na Aruba. Den e caso aki, e comision lo mester sondea cua refineria lo ta viable pa Aruba. Crudo Venezolano no por wordo uza den refineria di Aruba pa motibo di e sancionnan cu a causa problema caba.
E di tres scenario cu lo wordo evalua ta e situacion si unda Aruba lo por desaroya su economia sin refineria y wordo reemplasa cu algo otro cu por crea cupo di trabou y ta genera actividadnan economico.
“Esakinan ta e tres scenarionan cu a pone riba papel y cu Ministerraad a aproba pa insitui un comision cu ta consisti di varios consehero di varios minister; varios persona mas technico; conocedonan di e materia di refineria, di economia y desaroyo, di asuntonan territorial, y huridico. Den 2 luna, e comision aki lo entrega su conseho na Gobierno di Aruba cu un evaluacion complete di e tres scenarionan presenta. Pa Gabinete Wever-Croes, e ser humano ta keda central. Y riba e refineria Gobierno ta trahando pa yega na solucion mas pronto posibel na e benificio di nos pueblo”, Prome Minister a duna di conoce.