Serlimar a anuncia su 4 roll-off roll-on trucks nobo marca Freightliner. E trucknan aki a wordo revela durante un conferencia di prensa den presencia di Minister Otmar Oduber, Director di Serlimar sr. Henley Davelaar y tambe representante di R.E. Yrausquin. Cu e trucknan aki Serlimar por sigui brinda e comunidad di Aruba e servicio completo den maneho di desperdicio na un forma mas eficiente.
Esaki ta un paso enorme pa loke ta trata e servicio cu Serlimar ta brinda na comunidad y ta parti di e desaroyo nobo cu tin, di e forma nobo con ta atende cu desperdicio na Aruba. E proceso aki a inicia 1 aña pasa.
Banda di esaki, Gobierno di Aruba ta den un proceso cu den dos siman, e prome resultadonan ta cuminsa sali di tres destaho publico cu ta tumando luga pa loke ta trata e maneho di desperdicio na Aruba. Un di nan pa remediacion di Parkietenbos, eliminando e dump y comberti e area den algo sumamente positivo pa Pais Aruba. Algun siman despues lo tin e di dos resultado di destaho, esta pa e ‘sanitary landfill’/ (dump nobo), caminda cu lo realisa esaki den forma responsabel teniendo na cuenta medidanan y normanan internacional pa proteha medio ambiente y salud di ciudadanonan. Finalmente na luna di augustus lo ricibi resultadonan pa loke ta e mashin di ‘waste to energy’ incinerator. Tur esaki lo haci Aruba un isla ehemplar pa e forma con ta maneha desperdicio.
Gobierno di Aruba tin un plan holistico pa maneho di desperdicio responsabel, pa percura cu e promixo generacionnan ta haya un situacion mihor di loke ciudadanonan a biba cu ne e ultimo decadanan.