ORANJESTAD – Den area di experticio pa loke ta trata caracteristica di personalidad, Experto Certifica den Tipo di Personalidad, Sra. Sharleen Tromp recientemente a keda invita pa duna lectura na curso di pareha riba plataforma di famia di Fundacion Family First, Conoce bo Pareha 2019.
“Locual cu tabata notabel ta cu durante di e lectura cursistanan individual, a haya manera un conviccion di nan mesun personalidad, pero tambe nan a reconoce e personalidad di nan pareha. E tabata hopi fructifero paso na a keda cu hamber pa haya sa mas, ya cu esaki a yudanan compronde otro. Locual mi a experiencia, ta con compatibel e parehanan ta cu otro, sin cu nan sa. Nan mes a experiencia con cierto di e debilidadnan di uno, ta e fortalesa di e otro. Y con berdaderamente nan ta un (1) ekipo si nan capitalisa riba e puntonan fuerte di cada uno,” Sra Tromp ta conta.
Cursista Sra. Erilu Arcaya cu a participa na e lectura a bisa, “Wauw despues di a scucha e material y a haci e test cu nos mester a haci, mi a realisa cu ta pa e motibo aki mi ta haci cierto cosnan y mi ta pensa di cierto manera. Apesar cu mi ta eynan cu mi pareha pa nos como pareha, mi a hasta pensa hopi riba mi yiu grandi. Sharleen a splica hopi great y hopi relacional unda el a conta su propio retonan den pasado y con e mes a cambia. Su informacion tabata hopi valioso pa mi como pareha. Pero tambe como mama. Ami cu mi pareha ta ful opuesto, pero esaki a duna un bista con pa maneha esaki di forma cu lo funcciona pa nos.”
“Ami a hay’e hopi bon mes, e material di personalidad ta duna bo un otro perspectiva di bo pareha, kiermen cierto cosnan cu mi tabata considera como negativo den mi pareha, mi a siña wak nan como parti di su personalidad. Cosnan cu, nos cada un di nos, tabata te hasta rabia di mira den otro, awor nos no ta rabia mas pasobra nos a logra compronde cu esaki ta parti di e caracteristica natural,” cursista Sra. Rafael a bisa.
E material di tipo di personalidad ta un herment cu ta duna individuonan conocemento pa por identifica nan puntonan fuerte, como debil y di esunnan rond di nan tambe pa asina crea relacionnan sano, reconoce cu nan punto di bista no nesesariamente ta esun corecto y pa asina por ta exitoso den nan relacionnan, como tambe, ora di traha den ekipo.