Hooiberg – Diadomingo marduga algo pasa di 1:30 a.m, informacion a drenta cu “nan lo a los tiro” altura di un adres na Hooiberg.
Mesora polisnan a cuminsa bay e direccion, e team di AT ariba caya tambe a sali e direccion.
Patruyanan di Santa Cruz despues di a tira bista rond den e area unda supuestamente nan a tira, no a bin topa cu niun hende.
E patruya di AT(Team di Aresto) cu tambe tawata bayendo e sitio pero pasando altura di Pavia a topa un homber na careda.
Mesora nan a baha bay su tras, door cu e homber a core drenta mondi. Polis lo a los tiro di advertencia.
Despues di algun minuut cortico nan a sali cu e homber.
No ta conoci si e homber aki lo ta esun cu aparentemente a tira na Hooiberg.
Ela wordo transporta pa warda, y eynan lo por haci algun test pa mira si tin polvo ariba su man of paña. Di e manera eynan por haya sa si ela tira of no.