Durante encuentro den sala di Parlamento cu Prome Minister Evelyn Wever-Croes, Alan Howell, miembro di fraccion di POR tabatin diferente pregunta relaciona cu e ceramento di frontera, situacion di Citgo y tambe riba consenso nacional.
Howell a indica cu Fraccion POR ta admira e curashi cu Prome Minister tin pa purba sali for di e preta cu nos ta aden y a desea Prome Minister forsa y sabiduria pa sigui busca tur forma pa por logra sali di e situacion aki na bienestar di nos pais.
Relaciona cu e ceramento di frontera, Alan Howell a haci e siguiente preguntanan:
Frontera a wordo cera pa mas o menos un luna debi cu ley ta prescribi cu mester pone un fecha. Fraccion di POR ta sostene e decision aki, pero pueblo kier sa kico lo por pasa cu lo ta asina grave cu lo por bin cu un prolongacion di e ceramento di e frontera?
Tambe si lo por tin un manera pa sa si lo por habri e frontera aki prome cu e luna pasa?
Pa loke ta e refineria, Howell a haci e siguiente preguntanan:
Minister President por ta na altura si mas hende por bay cas pronto na e refineria?
A papia di bay, por splica kico exactamente kiermen?
Cuanto porciento Prome Minister por bisa cu Citgo lo keda?
E posibilidad pa Citgo no sigui, pero e refineria si y procesa crudo di Venezuela ta factibel?
A pensa di bay over na un RFI (Request For Infromation) pa otro companianan tuma over e refineria?
Cuanto contratista no a haya nan pago for di Citgo y cuanto e suma aki ta?
Un di tres posibilidad ta un Aruba sin refineria y e pregunta ta con lo haci cu e personanan cu lo perde nan trabou? E comision existente lo presenta otro posibilidadnan?
E ultimo pregunta di Alan Howell na Premier Wever-Croes tabata:
Den ki forma Prome Minister lo bay scucha di comunidad y con e personanan lo por tin un input den cuadro di e consenso nacional?
Finalisando Alan Howell a gradici e esfuersonan grandi di Prome Minister den e proceso aki y un biaha mas a desea Premier Wever-Croes pasenshi y exito den e proceso pa logra cu nos comunidad ta esun cu lo sali beneficia.
