Pa hopi aña e aspecto di bienestar di naturalesa y medio ambiente no a wordo poni como prioridad pa cual por mira e consecuencia di esaki. Un di e motibonan principal pa cual den Gobierno actual a pone e carteranan di infrastructura y medio ambiente hunto ta reconociendo cu trabounan mester wordo haci y pa por realisa e meta cu a poni pa crea e balansa entre desaroyo y proteccion di medio ambiente.
Minister di Desaroyo Teritorial, Infrastructura y Medio Ambiente Otmar Oduber ta pone hopi esfuerso den leynan nobo manere esun di Parke Marino, pero tambe e Ministerio ta poniendo hopi atencion riba leynan existente manera e Raad voor de Ruimtelijke Ontwikkeling (RRO) cu despues di 10 aña cu ya tabata existente, aworaki den un bachi nobo ta haciendo hopi trabou den cuadro di ROP y ROPv. Banda di esaki tin comision di Flora y Fauna cu tambe ta existi pa hopi aña pero cu no tabata mucho activo, aworaki tin un comision cu ta consisti di 5 experto cu ta sumamente activo. Ta intercambia pensamentonan, conseho y conocemento den diferente situacion cu ta confronta cu ne rond Aruba.
Situacion di UTV’s tin atencion di Gobierno
Ehempelnan recien den cual di consehonan pidi na e comision Flora y Fauna ta riba e tema di cobamento di santo y kibramento di piedra pa mira con ta bay atende cu e buraconan cu a keda rond Aruba.
Adicionalmente, recientemente Ministerio a acerca e comision Flora y Fauna tambe pa conseho riba e situacion sumamente lamentabel cu frecuentemente ta confronta cu ne, unda cu UTV nan ta core den areanan di naturalesa y e destruccion y daño cu esaki ta causa na nos medio ambiente / flora y fauna! Conhuntamente cu DTI lo bin cu un plan di con pa atende cu e situacion aki. E seguridad y legalidad di e vehiculonan aki ta cay bou DTI y e daño enorme causa ta falta di respet na nos medio ambiente, pa cual a acerca e comision di experto pa por yega ma un solucion mas pronto cu ta posibel!
Di e forma aki ta ilustra cu Ministerio trahando den forma structura, consistente y transparente cu departamentonan pa salvaguardia Aruba su naturalesa y medio ambiente.