Recientemente e titular di e carteranan di Transporte, Comunicacion y Sector Primario, sr. Chris Romero, a bishita diferente stacionnan di radio local pa asina duna mas informacion riba e proyecto di San Nicolas Port Authorities and Development. “Mi ta hay’e necesario pa mantene nos comunidad debidamente informa di tur e desaroyonan cu ta tumando lugar rond di San Nicolas Port Authorities and Development. P’esey mi a tuma e iniciativa pa bishita diferente stacion di radio rond di nos isla pa comparti e plannan progresista cu Gabinete Wever-Croes tin pa San Nicolas”, tabata palabranan di Minister Chris Romero.
E proyecto di San Nicolas Port Authorities and Development ta uno hopi prometedor pa San Nicolas y Aruba completo. No solamente e lo ta e entidad pa controla e desaroyo y operacion di e Fast Ferry, pero tambe lo ta trahando man den man cu diferente desaroyadornan pa asina trece proyectonan positivo cu lo impulsa e economia di San Nicolas. “Tin diferente tereno na San Nicolas cu a bira propiedad di Pais Aruba atrobe y pa cu esakinan tin hopi interes di diferente inversionistanan pa desaroya proyectonan prometedor na San Nicolas”, Minister Romero a enfatisa.
San Nicolas Port Authorities and Development no ta bay wordo articula cu e intencion pa competi cu ningun otro compania. “E intencion no ta pa San Nicolas Port Authorities and Development haci e trabou cu APA ta bin ta desplegando eficientemente den tur e añanan aki, pero mas tanto e lo complementa nan trabou pa cu e waf na San Nicolas. Pero pa tur esaki por pasa e ley mester wordo aproba pa Parlamento. Tur esaki ta den preparacion caba y prome cu reces Parlamentario nos lo presenta e ley di San Nicolas Port Authorities and Development, pa asina continua cu e siguiente stapnan pa cu e gran proyecto aki”, Minister Chris Romero a finalisa bisando.