Recientemente Parke Nacional Arikok a percura pa ceramento di e caminda na Shete cu tabata ser usa pa yega Conchi. Bario di pariba tabata boga pa hopi aña caba pa por trece alivio den e situacion cu nan tabata biba aden. Hopi aña a pidi pa kizas aloca verkeersplateau pa motibo di velocidad halto di vehiculonan ey tras. Pero e problema a bira mas pio ora cu na momento di orario di cierre e vehiculonan tabata pasa rond creando nan mesun ruta alternativo haciendo maluso di esaki y tabata crea hopi molester pa e ciudadano den su hogar cu tabata ser yena cu stof. Cu cierre di esaki e bario a sinti su mes alivia pa un problema di hopi aña.
Awo cu e ruta nobo
Ruta di Shete a ser cera, e vehiculonan aki mester pasa door di Parke Nacional Arikok pa por yega Conchi. Pero pa por yega aki hopi ta pasa e caminda di tera Shete/Sombre y sali na San Fuego. Pero e ruta aki ta uno completamente di tera y sigur pa locual ta e parti final cu ta sali na San Fuego, e habitante ta ser mal suta cu stof tur dia. E habitantenan eybanda casi no por ni tene nan cas mas habri pa motibo di e tantísimo stof cu e vehiculonan aki ta lanta. E propio ciudadano a laga pone algun drempel di granit p’asina percura pa por baha velocidad y asina e molester di stof por ta menos.
Peticion na Minister di Infrastructura
E habitantenan aki cu tur dia ta ser asota pa e stof aki y sigur di e ruta nobo pa por yega Parke Nacional Arikok, ta pidi Minister pa por yuda e bario cu poco asfalt pa por alivia nan di e situacion actual cu nan ta bibando aden, unda cu nan no por ni habri nan porta ni nan bentananan di cas pa nan por haya poco aire. E bario ta spera di por medio di mi persona como parlamentario por haya oido pa nan problema cu nan no a provoca.
Verkeersplateau
Hopi bario tin peticion aden pa verkeersplateau pa motibo di velocidad halto. Contento si di wak cu un di mi peticionnan pa pone verkeersplateau rond di scolnan a cuminsa conoce bida unda cu a pone dilanti Colegio San Antonio. Awo nos tin di sigui monitor pa cumpli cu locual a ser enfatisa, esta pa percura pa tur caminda cu tin scol e verkeersplateau ta e prioridad y sigui pa e barionan.
Camindanan di asfalt
Otro peticion cu ta keda grandi ta e mehoracion di camindanan existente cu ta den hopi mal estado y cu cada bes ta bin tira lapi lapi di asfalt riba esakinan cu ta haci cu casi no por maneha mas riba e camindanan y un ehempel di esaki ta e caminda principal di Warawara, Picaron y San Fuego. Banda di esakinan pueblo ta keda alerta cu promesanan haci pa hopi aña caba pa partidonan politico y mi deber como representante di pueblo ta pa recorda nan riba esakinan, entre otro e camindanan di tera di Jan Flemming, Macuarima diferente caminda di tera, Coba Lodo y Angochi, Sabanilla Abao, Cas Ariba, Papilon, Ayo y asina por sigui menciona pa recorda e Minister di Infrastructura pa e por mehora e infrastructura den barionan di Santa Cruz y Aruba den su totalidad.