Na comienso di siman, hunto cu Minister di Husticia, Andin Bikker, Prome Minister Evelyn Wever-Croes durante conferencia di prensa di Gobierno di Aruba, a elabora riba e topico di Venezuela, e impacto cu e crisis migratorio tin riba nos pais y asilo. E tema aki ta keda un prioridad grandi pa Gobierno di Aruba. E impacto di e crisis migratorio di Venezuala ta grandi. Na ningun momento Gobierno a purba di sconde e hecho aki. Na Aruba tin hopi Venezolano cu ta permanece ilegal cu mester haya atencion di Gobierno.
Ultimamente a tema di asilo ta halando hopi atencion den nos comunidad. A bin te hasta un caso sumario cu lo mester a wordo trata den corte diabierna pero esaki a wordo hala aden door di e abogado. E caso aki a wordo entama pa un grupo di Venezolano kendenan a pidi asilo. E grupo aki a pidi acerca vivienda, gasto di medico cubri, scol pa nan yiunan, y oportunidad pa nan traha riba nos isla.
Gobierno na su turno a studia e caso a fondo. E demanda di e grupo no tawata solamenta pa pais Aruba sino tambe pa pais Hulanda. Gobierno conhuntamente cu abogadonan di pais Hulanda a traha den esaki. E conclusion cu a yega na dje ta cu Aruba tawata para hopi fuerte den e caso aki. Esaki pasobra Aruba tin un maneho basa riba tratadonan internacional ora ta traha e topico di asilo. Aruba ta compliendo cu exigencianan di tratadonan internacional cu Aruba ta parti di dje. E tratado internacional ta indica claramente kende si y kende no por haya asilo.
“Es cu si bin na remarke, lo haya e proteccion cu e tratado ta stipula. Esun cu no por haya asilo, no por haya proteccion tampoco y no por keda na Aruba tampoco pasobra e lo no tin base legal pa permanece riba nos isla. Aruba no ta den crisis. Aruba tin un estado democratico. Nos reglanan y nos leynan ta aplicabel. Pa un persona ta na Aruba, e mester tin un permiso”.
E maneho di Gobierno di Aruba, cu a wordo traha cu asistencia di Hulanda cu tin hopi mas experiencia riba e tereno di asilo y ilegalnan, awe ta dunando resultado cu nos tin un maneho bon hinca den otro y dentro di exigencianan di tratadonan internacional. Esaki a wordo demostra tambe cu 3 caso sumario den e siman aki cu a tuma luga den corte na unda nos maneho a wordo aproba door di corte. Ta trata aki di entre otro di Venezolanonan kende tawata na Aruba pa un tempo caba, nan a haya permiso pa traha, y nan permiso a vence, nan no a bay bek pero awo nan ta busca asilo. Esaki no ta e manera cu tratado internacional ta traha. Una bes cu e persona ta na e pais pa un tempo, segun tratado internacional, e no por pidi asilo mas. Gobierno den e caso aki, a gana tur tres caso. Y asina tin varios caso mas di personanan individual na unda corte a duna Gobierno rason. E maneho cu Gobierno a stipula dentro di exigencianan di tratadonan internacional ta wordo aproba pa corte.
E caso mes cu lo mester a tuma luga diabierna, na unda un grupo di persona a exigi varios cos, a wordo hala aden door di nan abogado na e momento cu nan a ripara cu no tawata suficientemente fuerte pa un caso sumario.
Prome Minister a enfatisa un biaha mas cu e tema di Venezuala y asilo ta un tema hopi delicado y complica. Esaki ta tuma hopi tempo di tanto Prome Minister como tambe di Minister di Husticia. E esfuerso ta pa tin e siguridad pa tene tur interes na consideracion.
“Con cu bay bin, Venezuela ta pasando den un situacion hopi dificil. Como bon Arubiano, nos semper a ricibi esnan cu a bin bati na nos porta y purba yuda. E maneho aki si no a cambia. Esaki ta e Aruba cu nos conoce y ta stima. Pero den e cuadro aki, nos mester para keto y considera te na unda nos por yuda”.
Prome Minsiter ta haci un apelacion riba e pueblo pa keda trankil y no drenta den panico y tampoco sembra odio. E situacion na Venezuela no lo bay cambia pa awo. Si bin un cambio di regimen mes na Venezuela, e solucion lo no bin mesora. Aruba lo bay keda sinti e efectonan di Venezuela.
“Pero un cos cu nos no mester haci ta drenta den panico. Pasobra nos no por soluciona e problema y panico no lo yuda. Tampoco nos mester sembra odio. Pasobra esey no ta e cordialidad di e Arubiano. Nos pilar economico ta keda Turismo por lo tanto nos mester brinda tur turista cu ta bishita nos un bon trato di cordialidad pa e regresa nos pais y trece mas turista pa asina nos economia por desaroya. Ban keda trankil. Gobierno di Aruba tin atencion pa e crisis aki y tine bou control y asina nos ta keda atende cu tur loke cu bin den nos caminda e siguiente dianan. E disicionnan cu lo tuma, cu trankilidad y espacio cu comunidad ta duna nos, lo wordo tuma den interes di esnan cu ta pidi asilo pero especialmente den interes di Aruba. Pasobra si nos mes no pensa riba Aruba, ningun hende lo haci’e pa nos”, Prome Minister a expresa.