ORANJESTAD – Diaranson anochi Minister di Turismo sr. Dangui Oduber a haci e apertura oficial di CATA “Conferencia Anual de Turismo Aruba” cu a tuma lugar na Hyatt Resort & Casino. Den e reunion aki tabata tin presente 60 operador turistico incluyendo varios aeroliña di 9 pais di Sur America y America Central, pues un reunion regional.
E aña aki ta e di 29 edicion di CATA na Aruba, CATA ta wordo organisa anualmente pa e “tour operators”, “online tour operators” y nos partner den aeroliñanan di Latino Americano. CATA ta e evento anual di mas grandi cu ta wordo organisa pa ATA conhuntamente cu AHATA y Aruba Airport Authority pa e “Tour Operators” di Latino Americano. E meta di e reunion aki ta pa e partnernan den turismo bin Aruba y experencia kico Aruba tin di ofrece turisticamente y tambe haya informacion riba desaroyonan cu ta andando di producto Aruba. Pa asina e partnernan conoce otro y traha riba futuro negoshinan for di Latino America pa Aruba.
Den aña 2018 Aruba a ricibi mas di 1 miyon bishitante di cual 15 porciento tabata procedente di Latino America. Minister Dangui Oduber a sigui menciona den su discurso tur e proyectonan cu ta andando y esnan cu lo cuminsa pronto pa cu e producto turistico di Aruba. Proyectonan manera e Boardwalk di Malmok, embeyesimento den area di Palm Beach dilanti Brickel Bay Resort. Proyectonan di mehoracion di infrastructura y embeyesimento na San Nicolas di e area di Baby Beach, Rodgers Beach y tambe e re-apertura di e oficina di turismo San Nicolas cu ta ful moderno. Por ultimo e mandatario a papia di e magno proyectonan “Gateway2030” di e expansion di Aeropuerto Internacional Reina Beatrix y di e proyecto di “Port City” unda lo desaroya ful e area di Oranjestad.
Finalmente Minister Dangui Oduber a yama danki na ATA, AAA, AHATA pa organisa e reunion di CATA 2019 y tambe tur esnan cu di un manera of otro ta contribui na e turismo di Aruba. Turismo ta keda e driver principal di nos economia.