Dia 21 di December 2018, Aruba y Corsou a firma un Memorandum of Understanding (MoU) unda cu a acorda cu lo desaroya un Fast Ferry entre e islanan aki. Preparacionnan pa cu un proyecto di e magnitud aki ta andando satisfactoriamente y actualmente ta den e fase pa formula e “dienstoverlening” entre Aruba, Corsou y e posibel operador di e Fast Ferry. Pa cu esaki lo mester bin un financiamento chikito di parti ambos Gobierno, pa asina sigui cu e siguiente fase pa cu e desaroyo di e proyecto Fast Ferry.
Algun di e terenonan di refineria cu a bira disponibel lo ta destina pa e Fast Ferry
Gobierno di Aruba a sondea tur posibilidad y segun studionan di factibilidad cu a keda realisa caba, por mira cu e area adecua pa desaroya e Fast Ferry ta na San Nicolas. Pa cu esaki a designa caba un tereno cu antes tabata di refineria y cu awor a pasa pa Gobierno di Aruba. Den e plannan aki Minister Romero ta hayando coperacion di Conseho di Minister pa asina aloca e fondonan y terenonan necesario pa por cuminsa cu e realisacion di e Fast Ferry na San Nicolas.
Gobierno di Aruba no lo financia e proyecto di Fast Ferry completamente
“E ta asina’ki cu cada proyecto ta wordo financia door di esnan cu kier desaroya e proyecto. Kiermen, Aruba mes no ta bay haci inversionnan den e diferente proyectonan cu lo bini. E inversion lo keda den man di e desaroyadornan y cu nan experticio nan lo realisa e diferente proyectonan cu tin riba mesa pa loke ta e construccion di e Fast Ferry na San Nicolas”, Minister Chris Romero a duna di conoce.