ORANJESTAD – Diamars atardi Minister di Turismo, Salubridad Publico y Deporte sr. Dangui Oduber tabata den un conferencia di prensa hunto cu e directora di IBiSA sra. Monique Van Embden, Edgard Erasmus y William Erasmus di IBiSA di parti deporte escolar.
Den e conferencia aki e mandatario a anuncia cu dia 24 di mei binidero lo ta e apertura oficial di Olimpiada Escolar na stadion Guillermo Prospero Trinidad na Dakota pa 5 or di atardi. E Olimpiada Escolar lo tin un duracion di 3 siman y ta conta cu casi 2000 alumno cu ta participa na dje di 62 scol. E ta algo bunita ora bo ta wak scolnan y alumnonan competi contra otro den deporte, e mandatario a expresa. For di aña pasa caba e scolnan di nivel Preparatorio, Basico y Avansa a cuminsa cu e fase di clasificacion pa e Olimpiada Escolar. Minister a splica cu e apertura di e Olimpiada Escolar ta e final di tur e disciplinanan di deporte pasobra e clasificacionnan a cuminsa caba desde di aña pasa.
Olimpiada Escolar a inicia na aña 2002 bou maneho di ex Minister di Deporte sr. Ramon Lee, na aña 2010 esaki a wordo para pa Gabinete Mike Eman 1 y awor despues di mas di 8 aña Minister Dangui Oduber ta rebiba esaki bek na bienestar di nos muchanan. E mandatario a trece dilanti cu na momento cu su persona a drenta gobierno e la pone den su maneho pa cuminsa bek cu e Olimpiada Escolar. “Esaki ta parti di nos vision pa stimula deporte, stimula nos muchanan pa haci deporte y participa activamente na deporte y olimpiada escolar ta algo instrumental den e vision aki” asina e minister a expresa. Pa tur cos cana manera cu mester ta gobierno a dicidi di instala un comision special pa organisa e Olimpiada Escolar.
Finalmente e mandatario a gradici IBiSA pa organisa y planea e Olimpiada Escolar, e la gradici tambe trahadornan di Ministerio di Turismo, Salubridad Publico y Deporte. Tambe Minister a gradici Departamento di Cultura cu lo bay yuda den e parti apertura oficial cu ta bay tin.
Minister Dangui Oduber a expresa cu e ta sumamente contento cu e re-apertura di Olimpiada Escolar cu ta algo bunita caminda gobierno ta mustra cu e tin deporte na pecho y ta trece participacion activo di nos muchanan den deporte