Despues di 3 siman di e fracaso di e supuesto manifestacion nacional y cu a laga e lider di AVP Mike Eman den un trauma mental, siman pasa e lider aki a bolbe riba pantaya politico y na lugar di bay den conferencia di prensa pa splica unda e gobierno actual lo tin cu saca e fondonan necesario pa paga e proyectonan PPP di 2 biyon florin, pa paga nos debe nacional di 4.2 biyon florin y pa paga e interes di 230 miyon florin pa aña (600 mil florin pa dia!), Mike Eman a dicidi di ataca e gobierno actual pasobra e gobierno a dicidi di aumenta e salario minimo cu 3% entrante 1 di mei 2019.
AVP semper contra tur cos
Hecho ta cu ehecutando e aumento di salario minimo e gobierno actual a pensa riba e clase trahador cu tambe merece di haya poco entrada extra pa cubri nan gastonan diario y AVP a bay contra e hecho noble aki. Pero esaki semper tabata e modus operandi di AVP, esta di bay contra tur locual ta na beneficio di pueblo y e clase trahador. Ta parce cu pa AVP nada cu e gobierno actual haci no ta bon. Nan ta contra aumento di salario minimo, nan ta contra construccion di casnan social, nan ta contra otorgamento di tereno pa nos Arubianonan, nan ta contra asfaltamento di camindanan, nan ta contra di helicopter y contra di radarnan cu den pasado nan mes a destrui, nan ta contra desaroyo hotelero na San Nicolas etc.
Salarionan Minimo, 2001-2019
Pero locual ta un berguensa total ta ora cu Mike Eman y su gobierno den pasado a tira solamente un garnachi di salario minimo pa e clase trahador. Asina nos por mira con durante 8 aña (2010-2017) Gabinete Eman a aumenta e salario minimo na 3 ocasion so cu apenas un miserabel Af. 135.70 cu ta un averahe di 17 florin pa aña, mientras cu bao di Gabinete Oduber (2001-2009) durante 8 aña a aumenta e salario minimo na 6 ocasion cu total di Af. 431.15, pues cu un averahe di 54 florin pa aña. Y awor ta toca un otro gobierno di cual MEP ta forma parti di dje, esta Gabinete Wever Croes cu den menos di 2 aña a logra aumenta e salario minimo na 2 ocasion cu Af. 84.88 cu ta un averahe di 42 florin pa aña. E diferencianan grandi aki por ser mira riba e tabel adhunto y ta demostra cu ora cu MEP ta den gobierno semper e ser humano, e clase trahador ta central.
Ta di lamenta si cu durante cu Mike Eman tabata den gobierno, el a ricibi den total 970 miyon florin laga atras pa Gabinete Oduber y fuera di esey el a fia 2.1 biyon florin extra, a fia 2 biyon florin pa e proyectonan PPP y asina mes su gobierno no a logra aumenta e salario minimo den forma substancial pa e clase trahador. Y awe e ta instiga contra un gobierno cu si ta traha pa e pueblo. Ta p’esey tin un dicho ta bisa cu ora zoro ta conta su pasion, cunukero cuida bo patonan.