Den e plan cu minister di husticia, Andin Bikker a presenta na parlamento den e presupuesto, e ta pone atencion na cosnan cu awor no ta importante manera entre otro su plan di auto cu ta core su so, sin chauffeur y Parlamentario pa fraccion di AVP, Robert Candelaria ta mustra cu esaki por ta algo great y sigur mester pensa riba e cosnan aki den futuro.
Sinembargo, sr Candelaria ta mustra cu ora cu tin hopi topico urgente cu ta afectando comunidad, e asunto di auto sin driver por warda den su opinion.
“Ehempelnan di casonan cu si mester di atencion urgente ta entre otro e topico di abuso sexual di menornan.
Un otro ta cu nos no por mira mucho di e maneho di ‘ondermijnende criminalteit’ cu minister a papia di dje, cu ta inclui su maneho ta pa cu crimen organisa y su maneho pa cu droga.
E ta papia di dje si, pero kico concretamente e kier pa wordo haci of con por mira su maneho den practica ta keda onduidelijk?
Tur biaha esaki ta pas den e manera di opera di e minister aki.
Unda e prioridad di e minister ta? Con e ta dirigiendo su departamentonan?
Si ta pone atencion na ‘zelfrijdende auto’s’ pero no ta cla kico su maneho ta, pa cu casonan pisa y sensitivo manera abuso sexual of maneho pa cu droga, ta algo cu ta preocupa nos hopi.
Un KPA cu ultimamente ta wordo confronta cu casonan hopi pisa y sensitivo manera homicidio, casonan di abuso sexual etc no ta haña e atencion necesario di minister pa wak unda y con e minister por duna un man of con e por duna instruccion pa atende e topiconan aki.
Tog polis ta sigui haci su best pa traha mas miho posibel bou e circumstancia cu nan ta aden. No tin un edificio apropia pa warda di Playa.
Tog polis ta sigui haci su trabou. E pregunta ta con largo esaki por sigui? Tur cos tin su limite.
Mi ta bolbe hasi un yamada na minister pa purba caba cu e issuesnan importante manera pa apunta hendenan riba funccionnan vital den su ministerio.
Haci todo lo posibel pa ekipa e diensten cu material y personal pa tackle issues cu tur dia ta asota nos comunidad.
Busca consehero pa duna bon conseho unda e minister mester pone atencion. Papia cu e diensten y scucha nan.
Tin hopi issues cu ta precupa e personal manera nan rechtspositie, nan siguro y premienan.
Ta great cu minister tin un helicopter ta bula. Nos ta anhela pa e mesun energia cu el a hinca den e proyecto di helicopter pa awor, por wordo hinca tambe unda esaki realmente ta nesesario,” Parlamentario Robert Candelaria a mustra.
