Dialuna a tuma luga na Sint Maarten e reunion anual Koninkrijksoverleg Buitenlandse Betrekkingen. Esaki ta un reunion entre Minister President di Aruba, St. Maarten y Corsou y Minister di Relacion Exterior di Hulanda. Relacionnan Exterior ta un asunto cu ta regarda Reino y durante reunion anual aki, ta trata diferente topico ampliamente.
Un topico hopi importante cu a haya atencion ta e topico di Comercio y oportunidadnan economico. Prome Minister Evelyn Wever-Croes a expresa cu Aruba recientemente a publica nos vision economico y den e reunion a keda palabra cu den cuadro di Reino y embahadanan di Reino rond mundo, lo haci uzo di instrumentonan pa promove e agenda economico y atrae inversionistanan. Esaki ta crea oportunidadnan pa Aruba haya mas inversionista.
Tambe a haci palabracionnan cu lo colabora mas den organisacionnan regional manera Eclac y Caricom cu tin cierto beneficionan pa islanan manera Aruba, y especialmente pa Aruba por tin acceso na fondonan di e organisacionnan internacional aki. Den esaki a discuti tambe e consecuencianan di Brexit y e fondonan cu Union Europeo ta pone disponibel pa e islanan LGO, entre otro Aruba, Corsou y Sint Maarten. Hulanda a compromete pa haci su maximo esfuerso pa e fondonan cu Union Europeo ta pone disponibel no wordo reduci despues cu Inglatera sali di Union Europeo aki 6 luna.
Manera ta conoci ta a traves di Union Europeo, Aruba ta gosando di financiamento di proyectonan importante, sin costo alguno. E facultad nobo na Universidad, e SISSTEM ta un di e proyectonan importante y Aruba no kier perde mas oportunidad asina den futuro. E compromiso di Hulanda ta un prome paso. Awor mester warda riba e decision di Union Europeo riba esaki.
“Pa Aruba, e punto aki di agenda ta hopi importante especialmente mirando cu nos a publica recientemente e vision economico y e desaroyo economico cu Aruba kier atrae. Hunto nos ta mas fuerte para pa atrae inversionistanan pa nos logra nos vision economico”, Prome Minister a duna di conoce.