Diadomingo anochi Aruba a conoce un black out cual a inicia poco prome cu 5or y mey di atardi y cual a intensifica rond di 7or di anochi. Mas o menos 4or y mey di dialuna mainta a logra re establece e suministro pa cual aworaki Aruba por conta cu un situacion stabiel. Gobierno di Aruba durante di henter e proceso tabata den contacto estrecho cu WEB y Elmar, pa cual ta gradici e trahadonan pa nan trabou duro eherci durante henter anochi.
Minister Otmar Oduber durante di conferencia di Prensa di Gobierno di Aruba a splica cu a pesar cu Prome Minister sra. Evelyn Wever – Croes no ta presente pa motibo di un encuentro na Sint Maarten cu Prome Ministernan di Reino. Tabata den contacto estrecho cu otro conhuntamente cu Minister di Husticia sr. Andin Bikker pa loke ta e aspecto di e fayo cu a tuma luga den WEB.
Un di e diferente puntonan cu a duna atencion durante di e blackout tabata riba e parti di seguridad. Minister di Husticia a percura pa tin mas presencia/ visibilidad di polis riba caya como tambe atraves di e uzo di helicopter. Ademas, como consecuencia di e blackout cierto momento e sistema di riool den area di ‘high-rise hotels’ a pone cu DOW mester a drenta den accion tambe ayeranochi y te cu mainta tabata atende cu esaki, Minister Oduber a duna di conoce.
Di parti Gobierno di Aruba y den nomber di Prome Minister ta gradici e staff y trahadonan di WEB NV y Elmar NV pa e trabou grandi eherci. Pa por sigura cu e suministracion di coriente na Aruba completo por a tuma luga mas pronto cu ta posibel. Gobierno lo ricibi e rapportnan necesario for di Utilities y WEB pa di e forma aki mira con por percura pa evita situacionnan asina mas cu ta posibel, sr. Oduber a termina bisando.