Dialuna 29 april ta tuma luga na Sint Maarten un reunion entre e Prome Ministernan di Aruba, Corsou y Sint Maarten y Minister di Relacion Exterior Stef Blok. Ta trata di un reunion cu ta tuma luga un biaha pa aña y e aña aki ta na Sint Maarten.
Un punto crucial cu lo wordo trata ta e crisis di Venezuela y su impacto riba e islanan.
Prome Minister Evelyn Wever-Croes lo trece padilanti cu e impacto riba nos comunidad ta grandi. E cantidad di peticionnan pa asilo politico a aumenta hopi pero ta mustra tambe cu mayoria di persona ta haci mal uzo di e procedura di asilo pa keda Aruba. E situacion na Venezuela ta hopi dificil, y Gobierno di Aruba ta convivi y lo kier yuda unda cu por. Sinembargo na e momentonan aki nos como Gobierno mester atende cu e crisis cu nos tin na Aruba prome. Nos problemanan social, cu ta grandi, y nos problemanan economico y financiero.
Contrario na criticanan den comunidad, Aruba ta tene su mes na tratadonan internacional di derecho humano y ta respeta e derechonan di esnan cu ta deteni pendiente claridad di nan estadia na Aruba. Gobierno di Aruba ta vigila e procesonan di cerca, pero mester pensa awor riba Aruba prome.
Aparte di e tema di Venezuela lo trata tambe e tema di visa pa Aruba y relacionnan comercial exterior.
Prome Minister lo bolbe Aruba diamars mes y Minister Hulandes Stef Blok lo ta na Aruba diahuebs pa trata algun tema bilateral.