Sin duda algun e prome advertencia serio pa gobierno a bira un hecho diabierna ultimo ora cu un grupo grandi di ciudadano, a marcha bay dilanti oficina di gobierno cu sosten di partido AVP.
Un manifestacion c’un mensahe bon cla pa gobierno, esta cu ta basta na abuso, basta na medida contra pueblo, basta na hincamento di man den cartera di pueblo.
Melvin Tromp vocero di partido AVP a mustra cu e mensahe tabata cla y e manifestacion a logra su proposito, esta cu gobierno por spera pueblo sigui bin dilanti su stupi pa pone fin na su abusonan.
Na mes momento sr Tromp ta mustra cu tabata un momento sumamente notabel, pa mira Minister Otmar Oduber para hunto cu otro ministernan, den un scenario cu hopi hende no por a kere nunca su esaki lo bira e caso.
“Aki mi tin cu señala cu pa añanan largo, Minister Otmar Oduber a ser frma y educa pa e organisacion di partido AVP, pa semper a lanta para cu pueblo, contra abusonan di gobierno y den varios manifestacion den pasado, e mesun persona aki a para dilanti vociferando disgusto di pueblo, contra gobiernonan di MEP pa motibo di abusonan cometi contra di pueblo.
Parti di su formacion den AVP semper a enfatisa cu e tin cu cuida pueblo, proteha pueblo y percura pa pueblo por bira miho, cu mas espacio pa haci algo mas positivo cu su entradanan.
E minister aki a firma e decision di gobierno na 2009 pa reduci BBO cu 1.5%, el a marcha pa interes di maestronan, na interes di e homber chikito ora cu gobiernonan di MEP tabata comete abuso tras di abuso contra nos pueblo.
Mesun minister aki a sostene grandemente e decision di gabinete Mike Eman na 2009 pa duna mas na e ciudadano cu poco entrada, dor di aumenta sueldo minimo, dor di duna reparatietoeslag na esunnan di entrada abou, dor di cubra gastonan di scol pa centenares di mucha.
El a forma parti di e decision pa alivia e peso pa pensionadonan pasobra semper gobiernonan di AVP a traha pa yuda esunnan di menos entrada mas anto posibel.
Pa e motibonan aki ta un contraste asina grandi pa mira minister Oduber para dilanti di edificio di gobierno pa ricibi un manifestacion contra abusonan cometi pa e gobierno cu awe e ta forma parti di dje.
Para hunto c’un set di hende cu a yama su persona pa corupto, a acusa su persona di corupcion y hasta a bay entrega un keho na Ministerio Publico contra di su persona y a cuestiona su persona den e asunto di All Inclusive y otro asuntonan mas.
Ta mesun hendenan cu a duna e apodo di ‘un tal otmar’ den cual a trata di acusa su persona di a comete corupcion y ta mesun personanan cu a acuse di ta abusa di su funcion di minister.
Un politico cu a wordo forma y educa pa traha pa pueblo, pa sirbi interes di pueblo y pa proteha pueblo contra abusonan di gobiernonan di MEP, awor pueblo por a mira su presencia banda di esunnan contra kende el a lucha den pasado, contra kendenan el a acusa di ta abusado, di ta corupto y cantidad di otro acusacion mas.
Awe pueblo por a mira minister Oduber den un otro bachi, un bachi di abusado di pueblo, cu a laga su principionan di su formacion politico cay, pa sirbi su interes propio, pa un posicion di minister y forma parti awor di e traicion electoral cu su gobierno a comete contra pueblo, esta di goberna sin medida pero awor ta rancando miyones y miyones for di cartera di pueblo y sin duna pueblo nada bek.
Awe bo a lubida riba e partido cu a forma bo como politico y tur oportunidad cuj partido AVP a brinda bo, pa awe bo tene man cu bo enemigonan cu semper a huzgabo pa tur clase di nomber y awe tras di nan sonrisa cu b o persona, tin un falsedad enorme ta briya ,” Melvin Tromp di AVP a declara.