JENNIFER ARENDS-REYES (AVP): SIMAR PREOCUPA CU SIGURIDAD NA PIA DI TRABOU PA MAESTRONAN

Dialuna e Comision di Enseñansa di Parlamento a reuni cu e Directiva nobo di Sindicato di Maestronan di Aruba, esta SIMAR. Na Parlamento ta tumando luga un serie di reunionnan, entre otro cu e maestronan preocupa. Ta un grupo di docente cu a lanta y a forma un grupo pa expresa nan preocupacionnan na Parlamento y na Gobierno.
Sindicato SIMAR tabatin puntonan specifico awe durante e reunion, un di nan sigur halto riba agenda ta e siguridad na pia di trabou pa maestronan. Segun Parlamentario di Fraccion AVP, Jennifer Arends-Reyes, esaki a bin pa motibo di un incidente recientemente na un scol basico. Naturalmente Parlamento ta tuma e topico aki na serio. Den pasado tabatin diferente protocol. E Parlamentario ta kere cu banda di Parlamento, banda di legislacion, banda di Gobierno pero tambe e directiva di diferente fundacionnan cu ta dirigi scolnan na Aruba por ehempel SKOA, SPOA of otro directivanan tambe mester sinta y participa na pensa (brainstorm) riba un maneho diferente tocante esaki.
Hopi biaha ta bisa den un scol tin hopi actor. Tambe tin e cabesante cu tin di forma un punto di bista hunto cu su team kico ta e protocolnan cu nan tin como scol, con nan ta anda cu esakinan. Tur e puntonan aki ta importante pa henter enseñansa prome cu yega na legislacion, prome cu yega na Gobierno pa bay mira di berdad kico tin caba, kico por renoba, kico por uza pa asina implementa nan di un forma mas eficiente.
Den e reunion cu directiva nobo di SIMAR a scucha tambe kico ta nan punto di bista, kico ta nan pensamento tocante e topico aki.