Un pregunta cu ta surgi den comunidad ta pakico Aruba no por haya un ‘zachte lening’ manera Corsou y Sint Maarten si ta haya. ‘Zachte lening’ ta un fiansa na interes reduci cu Hulanda ta nenga di duna Aruba. Dicon Hulanda no ta yuda Aruba cu e lening aki cu interes mas abou manera cu Hulanda ta haci cu Corsou y Sint Maarten?
Pa contesta esaki, Prome Minister Evelyn Wever-Croes a bisa cu e contesta ta senciyo. Y ta mesun pregunta cu e tambe a haci na Secretario di Estado Knops kende enfaticamente a duna e contesta. E motibo pa cua Aruba no por haya e ‘zachte lening’, señor Knops a duna di conoce ta pa motibo di e protocol cu e Gobierno anterior di Mike Eman a firma na unda cu a yega na convenio cu Hulanda cu mientras Aruba tin deficit, lo no haya ‘zachte lening’.
Hulanda tin e deber segun rijkswet pa yuda Corsou y Sint Maarten tur aña cu nan tin mester di fiansa, pa bay cu nan riba mercado internacional busca e fiansa na interes hopi abou. Esaki no ta costa Hulanda niun cen. E unico tarea di Hulanda den esaki ta pa compaña nan pa nan logra un prestamo na interes abou. Ta e trato aki Aruba ta pidi tambe di Hulanda sinembargo Hulanda ta bisa cu no por.
Ariba esaki, dia cu Corsou y Sint Maarten a haya autonomia na 10/10/10, nan a haya kwijtschelding di nan debe. Hulanda e despensa nan di nan debe. Esaki Aruba nunca a yega di haya. Despues cu Aruba a sali for di e constelacion antiano, Aruba a sigui paga den e fondo di solidaridad di Antias pa islanan chikito. Aruba ta cana un trayecto completamente diferente cu Sint Maarten y Corsou. Aruba a costa Hulanda hopi menos cu Sint Maarten y Corsou, pero asina mes nan ta nenga di yuda Aruba pa haya e ‘zachte lening’ awo bisando cu asina cu Aruba tin un surplus otro aña, por cuminsa papia di un ‘zachte lening’.
“Ta di lamenta, cu awe, un biaha nos nos tin pa haya sa e motibo pa cua Hulanda ta nenga Aruba un ‘zachte lening’; y e motibo pakico nos mester paga 230 miyon florin na interes. Ta pasobra Mike Eman a redobla nos debe y riba dje a conbini cu Hulanda na unda cu Hulanda ta para fuerte pa no yuda Aruba haya un fiansa na interes hopi abou tanten cu tin deficit. Un contesta asina ta hopi decepcionante, pero e ta e realidad cu Aruba mester biba cu n’e. Pero Gabinete Wever-Croes ta trahando pa soluciona e problema aki tambe manera cu nos a haci anteriormente cu tur otro problema cu Gabinete Mike Eman a laga atras pa nos. Cu hopi orguyo, otro aña cu Aruba ta den surplus, e ora si nos por haya fiansa na interes reduci.
Pero un cos ta sigur, Gabinet Mike Eman no por bin bek nunca mas na mando. Pasobra e daño cu nan a causa Aruba, e redoblamento di e debe, y e echo cu nos no por haya fiansa na interes reduci, y tur otro dolor cu nan a causa den comunidad, ta hopi obvio cu AVP hamas por bolbe den un gobernacion pa Aruba.