Durante conferencia di prensa di partido AVP mr.drs. Arthur Dowers a confirma cu un biaha mas AVP a haya rason. El a remarca riba e racha di persecucion politico tumando luga riba nos isla dor di e actual Gobierno di coalicion. Un Minister cu awe ta cualifica como e berdadero Minister di inhusticia. Andin Bikker, persona cu pa hopi aña a vocifera e persecucion cu su persona lo tabata biba bou di e gobierno di MEP, cu videonan publico caminda e ta acusa partido MEP di ta bula cabes di directornan, awe ta tene man di e famoso Scorpion y ta haci pio cu nan.
Na momento di sumi poder, e prome mandatario pa start cu persecucion politico ta net Andin Bikker y tristo pa mira con a persigui empleadonan capas, bon prepara y bon den nan trabou cumpliendo “a pie de la letra” cu nan trabou. Ehempel di un di nan ta Elio Blijden, cual porcierto a gana su caso y igual cu ne tin mas hende cu tambe a gana nan caso e siman aki contra e persecucion politico di Gobierno, caminda Hues a bati riba man di Minister di Husticia. A mustre cu e tambe tin cu tene su mes na ley y respeta trahadonan di e pais aki.
Bou di mentira e la scoge pa bin dilanti y bisa cu a viola derecho di un persona ilegal na e momento ey, basa riba un status cu el a haya via di Rode Kruis mencionando tambe Organisacionnan na Merca (referiendo na organisacion cu ta proteha refugiadonan). Algun siman despues a bin afo y bisa cu e organisacion aki no tin nada di bisa Aruba, mientras a uza documento di e mesun organisacion aki pa kita e persona en cuestion for di su funcion.
Despues cu AVP a condena y denuncia esaki publicamente, a bin fabrica diferente otro storia cuestionando su integridad. Fabricando mentira, algo usual y frecuente uza den nan estilo, poniendo hende presta nan mes pa e mentiranan aki y presenta nan como prueba den un caso contra Elio Blijden di Warda nos Costa.
Tin cu mira cu asombro con awo e hendenan aki influenciando husticia, drentando den forma sushi pa busca na condena hende cu den nan bista no ta sostene nan partido politico. Un formula masha bergonsoso y increibel di parti un Minister cu pa decada a yama su mes esun mas sabi den e hemisferio aki, miho prepara pa fungi den e cargo, awe ta resulta di e ta un Perseguido/Abusado te cu mester yega na Hues pa dicta “Foutje” (tur siman) y bati riba su man cu e ta robes bezig.
“Nos ta spera cu e persecucion contra Elio Blijden a caba, pero conociendo e gobierno abusado aki, no lo straña nos cu nan lo ta pensando algo otro pa fabrica y sigui cu mas persecucion”, asina Parlamemntario Arthur Dowers a duna di conoce.
Tin cu pone atencion tambe na e persecucion tumando luga den Cuerpo Policial, unda ta minando nos polisnan. Palabra di forsa y perseverancia ta bay na Polisnan. Detencion y investigacion ta algo cu semper a tuma luga na momento cu algo grave a tuma luga, logicamente ta para pa esey tambe, pero no ora ta persigui den Cuerpo Policial pa meldingnan cu na otro paisnan ta bay via di rednan social. Mientras na Aruba nos ta kitando Polisnan for di trabou cu tin balor asina grandi pa nos pais, trapando riba nan di e forma aki. Den racha y sed pa persigui cierto hendenan politicamente!
Dowers ta termina bisando cu e cosnan aki hamas a pasa den historia di e pais aki y ta spera cu despues cu e grupo di abusadonan aki bay, nunca mas e pasa.