Dialuna 8 di April a tuma luga Conferencia di Prensa di Gobierno di Aruba. Minister di Desaroyo Teritorial, Infrastructura y Medio Ambiente Otmar Oduber a elabora riba e tema di maneho di desperdicio. Dianan 4 y 5 di April 2019 a tuma luga “Bid-Walk” pa maneho di desperdicio. Gabinete Wever- Croes a inicia un proceso bastante largo den forma transparente y integro pa locual ta maneho di desperdicio den futuro na Aruba.
Actualmente tin tres destaho publico grandi cu ta tumando luga:
RFP ‘Waste to Energy’, cual ta un sistema pa atende cu desperdicio a traves di un incinerator cu por medio di e sushi ta produci coriente. E sistema pa maneha desperdicio aki ta uno menos dañino pa nos medio ambiente compara cu e landfill.
Tambe, tin un proceso andando pa sanea/remedia dump Parkietenbos, cual ta den e fase di ‘bid-walk’. Esaki ta un gran noticia pa Aruba pero specialmente pa e bisindario di Parkietenbos cu dentro di algun luna ya no lo mira candela mas den e horizonte. E proceso lo inicia e aña aki y ta spera cu pa dentro di dos aña no mira candela at mas riba Parkietenbos.
E tercer destaho publico cu ta tumando luga ta esun pa e ‘sanitary landfill’ cual lo ta e dump (e dump nobo) cu tincu wordo organisa den un forma strategico, pa atende cu tur locual ta desperdicio peligroso y cual no por procesa atraves di incineration.
Algun luna pasa e proceso a cuminsa pa un destaho publico pa un ‘Waste to Energy Incinerator’ cual ta un ekipo cu ta transforma e sushi den energia/coriente. Den e prome fase di e proyecto un total di 27 compania a participa den e proceso aki y siman pasa a tuma luga fase dos y tres. Despues di cu tabatin e proceso di Request for Information (RFI) na cuminsamento di aña, a drenta aworaki den e parti publico (openbare aanbesteding) pa fase dos cu ta e remediacion di Parkietenbos. Tambe e fase number tres cu ta encera e ‘sanitary landfill’, caminda cu den forma responsabel y di acuerdo cu standard/norma nan pa preserva y cuida nos medio ambiente, lo atende cu e resto di ‘bottom ash’ y ‘flying ash’ genera door di e incinerador den futuro y materialnan peligroso.
E sistema cu Gobierno di Aruba a scoge yama ‘capping’, ta enfoca pa baha e sero di dump di Parkietenbos mas cu ta posibel. E meta ta pa yega na un nivel cu ta responsabel (14-15 meter) como cu e punto di mas halto actualmente ta 25 meter! Lo tapa esaki di un forma cu den futuro hende no lo sa mes cu tabatin un dump na e sitio, al contrario lo crea un alivio enorme pa henter e bisindario.
Cuminsamento di luna di juni lo conoce e ofertanan etrega door di e companianan nuebe companianan cu ta participando. Despues di dos luna lo haya sa cua di e companianan interesa ta esun cu e mihor oferta pa Pais Aruba. Pa despues cuminsa cu e proceso di contract cu mester yega cu e grupo.