Den e reunionan cu ta tumando luga rond di Aruba un cos ta resalta tur caminda: pueblo ta harta di e gañamento di e gobierno actual! Algo nunca bisto den historia di Aruba. Esey ta loke ta wordo expresa tur caminda anto cu ehempelnan concreto. Ta esey ta pone cu eleccion ta loke pueblo kier pasobra e gobierno aki a bisa cu e lo goberna sin medida, pero a impone y ta sigui impone medida. E partidonan MEPORED a bisa cu nan ta bay baha edad di pensioen. Awor trahadornan ta mira cu edad di pensioen ta keda subi. A bisa cu ta baha prijs di gasolin y gasolin ta subi. Nan a a bisa cu ta bay percura pa baha prijs di awa y coriente y no ta mira nada di esey. A bisa cu ta bay baha costo di bida, pero costo di tur cos ta sigui subi, subi y subi. Pero na mes un momento mas y mas friends & family ta haya fabornan y ta wordo nombra cu salario halto den gobierno. Ta esey ta pone cu tur caminda y diasabra anochi na San Nicolas, pueblo ta bisa: TA BASTA. NOS KIER UN GOBIERNO NOBO. NO UNO CU A GAÑA NOS“
San Nicolas a bisa cu “We want to say, we want to speak y we want to do.” Nos tur kier pa e voz di pueblo resona. E ta un voz colectivo di henter e pueblo aki cu ta bay manda un mensahe cu Aruba kier un eleccion nobo. Ta esey ta e sentimento cu ta biba den tur skina di e pais aki awe. Pa expresa esey bon cla, ta bay tene e MARCHA NACIONAL diabierna 12 april.
Parlamentario Mike de Meza a splica prensa cu e anochi aki tabata uno di informacion pakico e marcha. “Aruba tin un gobierno cu ta sinta a base di un engaño electoral. Tur e problemanan cu pueblo ta bibando cun’e ta consecuencia di e gañamento di MEPORED. Loke nos ta haci ta duna informacion pa pueblo forma su propio opinion a base di echonan y expresa su mes dia 12 di April awor. Ta den un union di henter pueblo, di hoben y grandi, di homber y muhe, di tur districto di Aruba, den forma pasivo ta bay manifesta y mustra gobernantenan actual cu e forma cu nan a gaña pueblo y cu tur e abusonan cu nan ta haci den gobierno, no ta acceptabel. Y pesey pueblo kier un eleccion nobo pronto!
E engañonan cu tin, cada bes, ta bira mas. Ta basta! Djis co’i e ehempel di e refineria. Dia cu AVP a sali for di gobierno, tabata tin mas di 600 hende ta traha eyden pa prepara e refineria pa habri. Awe por mira cu e refineria ta morto morto. E prome minister cu ta minister encarga cu asuntonan di energia, cada bes ta gaña pueblo over di e refineria. E ta gaña pueblo cu nan a haci algo. Pero mas y mas pueblo ta mira e berdad cu nan no a haci nada. Pesey pueblo ta bisa TA BASTA!
E gañomento cu e gobierno ta haci tur dia, e medidanan cu ya a impone y esunnan cu ta bay bin, e costo di bida ta haltisimo cu ta sigui subi pasobra gobierno mes ta aument’e enbez di purba baha e gasto pa pueblo, e storianan ficticio cu nan ta inventa tur dia, tur esaki tin pueblo harta!
Mike de Meza: “Cu tur e gañamento aki, cu e aumento barbado di tur tur gasto di pueblo y e incapacidad di gobierno pa soluciona sikiera un problema of sikiera cuminsa un proyecto pa pueblo den ya un aña y mey den gobierno, ta haci cu pueblo ta bisa “ENOUGH IS ENOUGH”. Nos kier eleccion nobo pronto!”