Siman pasa, Prome Minister Evelyn Wever-Croes, a tene e prome contacto telefonico cu Presidente Interino di Venezuela señor Juan Guaido. E iniciativa a bin di parti di señor Guaido kende tawata kier a papia riba e situacion di Venezuela y di e refineria.
Den e conbersacion cortico, señor Guaido a menciona e momentonan dificil cu pais Venezuela ta pasando aden cual ta conoci tambe pa Aruba. Señor Guaido a expresa su gradicimento pa e sosten cu Venezuela ta haya for di Aruba y otro paisnan den region.E situacion na Venezuela ta sigui igual. Fronteranan entre Venezuela y Aruba ta keda cera cu ta kita e libertad pa biaha entre e dos paisnan. Leu leu ainda tin buelonan cu ta trece of hiba esnan cu tin passport Hulandes of Venezolano.
Pa loke ta trata e refineria, señor Guaido a sigura Prome Minister cu pa nan e refineria tin un rol hopi strategico pa henter Venezuela. Señor Guaido a indica cu e ta trahando cu su ekipo pa asina pronto yega na claridad di e situacion aki. Señor Guaido tawata enfatico cu e no tin control di e structura di e companianan cual ta haci dificil pa e duna informacion riba e tema aki. Señor Guaido a termina expresando e interes cu e tin pa yega na un resolucion pronto pa cu e refineria.