Bao influencia di pensadornan di tempo di Ilustracion y e revolucionarionan Mericano y Frances nos ta apoya e idea cu solamente pueblo por ta fuente di autoridad publico cu ta legitimo. Esaki kier men cu pueblo ta e unico fuente di autoridad politico. Pueblo tin e poder exclusivo pa crea e orden legal. Den e contexto aki nos ta convenci cu nos constitucion ta e ley pa medio di cual pueblo ta crea nos Pais. Gobierno ta limita na actua a base di e acto di Pueblo aki: nos constitucion.
E pensamento di Ilustracion ta bay ainda mas leu. Pues, no ta suficiente cu gobierno ta wordo someti na nos constitucion duna dor di pueblo; Pueblo tambe mester tin un Voz decisivo den e forma cu gobierno ta ejerce su autoridad. Esaki ta nifica cu nos leynan mester por conta cu e aprobacion di pueblo, cu autoridad mester wordo ejerce dentro di e marco di leynan aproba pa pueblo y cu politica y maneho di gobierno por conta cu e consentimento di pueblo. Nos por mira e ideanan aki refleha den e famoso analisis di James Madison, den e Federalist No. 39 (un di e Founding Fathers di Merca).
Ta importante pa nota cu James Madison ta considera importante pa la legitimidad ta basa riba constitucion, eleccionnan, pero tambe riba e confianza continuo di e ciudadania. E ideanan di Ilustracion a haya nan caminda den nos orden legal contemporaneo. Un Pais respeta no por keda sin un constitucion cu ta garantisa un forma democratico di gobernacion y p’esey e constitucion mester (1) duna pueblo control riba creacion di leynan y (2) duna pueblo control riba su gobierno. Esaki ta implica cu e constitucion ta establece parlamento como curpa cu ta representa ciudadanonan. Pues, den un democracia pueblo ta goberna. E curpa representativo mester ta (co)legislador y controlador di gobierno.
Aunque e curpa representativo ta importante pa realizacion di democracia, esaki no ta suficiente. Pues, mester realiza tambe e derecho di voto universal, pa cada ciudadano, cu excepcion di motibonan justifica, manera lealtad (nacionalidad), interes (residencia) y madurez (edad). Den un democracia moderno, e exclusion di e voz di hende muhe, di hende pober of hende cu menos skol ta completamente fuera di discusion: tur mester por participa den e proceso democratico. Tur mester por elegi su representante y mester por presenta su mes na e eleccion pa representar pueblo.
E sistema di representacion y eleccion aki ta nifica cu promesanan electoral, programanan di partido y idealnan di partido mester wordo tuma hopi na serio. Pues, nan ta forma e base pa obtene voto di ciudadanonan. No por ta asina cu politiconan ta ignora completamente nan promesanan despues di eleccion. Pues, esey ta conduci na engaño electoral. Si e voto di e ciudadano ta basa riba un engaño e apoyo electoral di pueblo pa e politiconan aki no a wordo forma na un bon manera of nos mester considera e posibilidad cu nan no tin niun base en absoluto. Esaki no ta nifica cu ta imposibel pa haci compromisonan entre diferente partido politico, pero cu al menos nos por pone un vraagteken grandi ora promesana fundamental ta wordo ingnora por completo pa e solo motibo di oportunismo politico. Ora esey ta e caso, nos por sigui mantene cu e acuerdonan ey ta un traduccion veridico di interes publico? Pues, manera ta bisa na Spaño: “Cosa prometida es medio debida; y debida enteramente si quien promete no miente.” Of na Hulandes: Belofte maakt schuld. Es mas, e culpa ey ta sumamente grandi ya cu e ciudadano, pa medio di su derecho di voto, a confia su vision riba su sociedad na e sentido di responsabilidad y e compromiso di autoridadnan. Parlamento y gobierno por conserva nan legitimidad democratico solamente mientras nan por sigui conta cu e confianza di e mayoría di electorado.
Awor ta resta e pregunta: kiko lo mester ta e consequencia di e hecho cu e apoyo di pueblo ta termina? Nos sistema parlamentario ta conoce varios medio pa haci un apelo riba e conciencia di e autoridadnan, cu mester conduci cu nan ta saca nan propia conclusion y pone nan funcion na disposicion. E prome medio ta, por supuesto, e mocion di desconfianza. Ora parlamento adopta e mocion aki, parlamente ta duna di conoce na e ministro en cuestion cu e no por conta mas cu e apoyo y confianza di un mayoria den parlamento (cu na su turno ta representa pueblo). Tal ministro ya no tin un base democratico pa por sigui funciona. E principio di competencia popular ta exigi autorizacion di Parlamento pa e Ley di Presupuesto y tambe ta un medio cu parlamento por usa pa forza un ministro pa tuma su retiro. Ora Parlamento haci uso di e posibilidadnan aki, el Parlamento ta mustra cu e no ta di acuerdo cu e politica di un ministro en particular.
Sin embargo, den un sociedad democratico moderno, no mag di falta otro elemento importante ademas di un parlamento hunto cu realizacion di derecho di voto: pueblo no mag di keda limita na un voz cada cuatro aña durante eleccion, sino tambe durante henter e zittingsperiode di parlamento. Pa por realiza esaki, mester duna sociedad civil libertadnan y derechonan politico: libertad di expresion, libertad di asociacion y la libertad di reunion pacifico. Un manifestacion of marcha ta e ehercicio publico di e libertad di reunion pacifico y di declaracion publico di e opinion di ciudadano. P’esey un manifestacion ta e expresion legal di e deseo politico di ciudadanonan y un consecuencia directo di democracia. Pues, den un democracia na unda autoridadnan ta deriva nan poder di tur ciudadano, ta necesario cu sociedad tin e medionan pa expresa su sentimento y opinion.
E libertad di expresion, e derecho di asociacion y e derecho di reunion pacifico ta medionan pa haci un sociedad deliberativo y participativo posibel: un sociedad na unda decisionnan politico ta wordo realiza pa medio di dialogo cu ta garantiza participacion di henter nos comunidad. Pues, e libertad di expresion ta garantiza cu e ciudadano por expresa su pensamento y sentimento (sin censura previo) mediante e uso di un medio de comunicacion manera corant, internet of radio. E derecho di asociacion, e derecho di reunion y e derecho di manifestacion ta garantiza cu e ciudadano tin e libertad di intercambia opinion y di expresa sentimento y opinionnan comparti. Especialmente e derecho di reunion pacifico ta permiti e ciudadano critica colectivamente e accionnan di gobierno pa medio di protesta y manifestacion. E libertad di manifestacion ta brinda tur ciudadano e oportunidad di expresa su opinion, especialmente esun cu no por haci uso di imprenta of otro medionan di comunicacion. P’esey e derecho di reunion pacifico ta e derecho di expresion mas democratico!
Conforme articulo 11 di e Convencion Europeo di Derechonan Humano (EVRM), un convencion cu tambe ta vigente na Aruba, e ehercicio di e libertad di manifestacion por ta vincula na un permiso of vergunning ora e manifestacion ta tuma lugar publico. Sin embargo, tal procedimento of vergunning mag di tin como solo meta y objetivo pa permiti cu e autoridadnan por tuma medidanan necesario pa garantiza cu tur cos ta funciona sin problema. E otorgacion di e permiso no mag di depende di e contenido di evento.
En resumen, na momento cu pueblo ta haci uso di e libertadnan politico, pueblo por demonstra na e autoridadnan cu, por ehempel, ya nan no tin e confianza di e mayoria di electorado. Na momento cu pueblo ta haci uso di e libertadnan politico, e ciudadano por hasta exigi cu e autoridadnan ta convoca un eleccion nobo. Ora autoridadnan den un sociedad democratico no responde na e deseo di pueblo, nan ta perde legitimidad. Pues, ora nan nenga voluntad di e mayoria nan ta nenga e base democratico pa tur nan accion. Den otro palabra, ora ciudadania ta convenci cu promesanan no a wordo cumpli, e Voz di Pueblo mester resona!
Ryçond Santos do Nascimento
Un ciudadano.