Diabierna 29 maart 2019 Parlamento di Aruba a ricibi un grupo di maestro cu a bin entrega un manifiesto cu nan preocupacion pa seguridad di maestronan di Aruba na pia di trabao. Un manifiesto cu ta na su lugar debi cu pa hopi aña nos como docente, pasobra mi ta papia tambe pa mi experiencia como docente pa 18 aña, a bin ta wak con dia pa dia nos trabao como maestro ta na peliger. Durante añanan nos a conoce varios agresion físico cu a sali na cla, mientras cu tin hopi a keda scondi pa imagen pero cu ta totalmente fout. Nos a conoce hopi agresion verbal pero tambe hopi menasa tanto di parti di mayornan como alumnonan y sin conta destruccion na propiedad di docentenan, te hasta a bay asina leu di drenta klas y haci destruccion. Sin conta e uso di Facebook pa lastra ken cu ta incluyendo maestronan den esaki. Y e ultimo acontecimento, unda un mayor a agredi un docente, a pone cu e maestronan a uni y bisa ta basta na e situacion aki y nan a bin tanto na parlamento como gobierno pa entrega un manifiesto y cual seguramente ta un muestra tambe con tin di haci esaki na un manera pacifico y ordena sin stroba fluho di trafico y sigur pa un meta cu si ta hustifica.
Reunion den parlamento dialuna ultimo
Den bista di e importancia di e tema di violencia na scol contra docentenan mi persona a pidi e presidente di comision pa yama un reunion dialuna mes pa nos por scucha nan preocupacion y pa tur otro parlamentario comprende tambe nan situacion y pa trece claridad con lo mester atende e asunto aki. Y con por bay na un manera concreto y den fase pa logra garantisa seguridad di docentenan y muchanan cu tambe ta core risico den un situacion cu lo por escala. Un reunion unda cu nos tur por a sinti y biba e preocupacion cu ta reina bao di e cuerpo di docentenan. Un reunion bastante intensivo pero cu na final nos tur hunto ta wak den mesun direccion y cu ami sigur di parlamento lo sigui di cerca y lo ta di cerca cu e comision pa wak con cos ta cana pasobra si bo no insisti tur cos ta keda para. Y mi ta gradici con a haci esaki pasobra den dialogo por logra mas na bienestar di cada docente
Di aki mi ta urgi e Minister di Enseñansa pa fiha un fecha pa atende e comision p’asina por cuminsa for di gobierno encamina e caminda pa por garantisa seguridad di maestronan na trabao.
Cambio di mentalidad
Mi ta kere cu prome cos cu mester ser haci ta un bon programa di conscientisacion di e importancia y balor di un maestro pa nos comunidad. Esaki cu añanan a bay perdi y unda cu e respet pa un grupo di tata y mama yama maestro cu ta sali di nan cas pa educa yiu di otro hende, nos como tata y mama tambe mester coopera den e proceso. Nos como mayornan mester bira mas consciente y haci nos yiunan consciente pakico nan ta bay scol y sigur inculca educacion na nan cas di norma y balornan y cu pa medio di educacion ta e unico vehiculo cu por yuda nos cada un sali di nos situacion cual sea cu e ta. Un maestro ta un ambtenaar cu ta saca masha hopi di su saco pa hinca den educacion di yiunan di pueblo di Aruba. Placa cu nan por hinca den nan propio yiunan nan ta hinca pa drecha nan klas pa e mucha ta den un ambiente placentero y sin conta material extra cu ta sali di nan mesun saco manera laptop, beamer, television etc pa por duna e mucha e mihor educacion posibel. Tin departamentonan cu si no tin airco nan ta bay cas y ta pone trabao plat, mientras un docente tin di traha den calor y den situacionnan penoso y tur pa e mucha y si nan mester pone trabao plat nan ta ser categorisa como hende floho yen di vakantie etc. Anto ta netamente e mentalidad ey nos tin di cuminsa cambia y duna balor na nos maestronan cu mester di esaki.
Banda di esaki mester traha un protocol con mester haci den casonan di violencia y sigur e consecuencianan tambe mester ta cla pa comunidad. Tambe por pensa riba un protocol entre bestuur di scolnan y polis pa atende e asunto aki y cu por haci inval na scolnan y tambe den cierto oranan ta patruya pa garantisa segurdidad.
Politica
Ta lamenta si cu un miembro di parlamento, esta Michael Lampe ta hinca e manifestacion den arena politica. Ta hinca esaki den un contexto manera cu a manifesta pasobra ta contra mal trabao di un gobierno mientras ta trata di algo hopi serio cu ta seguridad di maestronan cu bao tur gobernacion a ser neglisha. Ami ta hopi contento cu e grupo di maestronan a tuma e curashi pa sali pa algo cu ta un derecho y sigur muestra di por confía cu e biaha aki si algo concreto por ser haci. Sigur cu den parlamento tin parlamentarionan cu di berdad sa kico ta e trabao di un maestro. Y tambe tin un Promer Minister Evelyn Wever-Croes cu semper a para contra tur sorto di violencia. Mi ta lamenta si e tipo di mentalidadnan aki di trece rabia den pueblo enbes di trece solucion, cu den e caso aki ami den parlamento y sigur te ainda como maestro lo persisti cerca gobierno pa atende e caso aki cu tur seriedad di mundo pa por yega na un plan concreto y cu ta ser ehecuta.
