Parlamentario Endy Croes ta reacciona riba e ponencia di Mike Eman kende awor kier invita pueblo pa bay manifestacion como cu Mike Eman kier pretende cu e resultado di eleccion ultimo ta basa riba KIEZERSBEDROG. Manipulacion di Mike Eman no ta caba. Aunke pueblo a rechasa AVP cu mas di 10 mil voto ultimo eleccion por mira cu Mike Eman kier purba tene su mes na e politica bieu y anticua di keda manipula un pueblo basa riba engaño. No ta pornada nos ta compara Mike Eman cu “HANANIAS” kende ta un profeta falso di Babilonia, segun escritura.
Significacion di Kiezersbedrog
Parlamentario Endy Croes awe ta publica e significacion di KIEZERSBEDROG y pueblo mes por subi internet y busca esaki. Ta bon pa nos analisa e politica zwak di Mike y awe lo decifra un otro engaño y manipulacion. Kiezersbedrog ta a.) als een kandidaat, na te zijn verkozen, de functie van volksvertegenwoordiger WEIGERT te aanvaarden. Ken a keda sin drenta Parlamento? Ken no a asumi su reponsabilidad y a rechasa su funcion? Michael “Mike” Godfried Eman entre otro a nenga di drenta Parlamento. Pues hustamente esaki ta KIEZERSBEDROG. Pues Mike Eman esaki ta fin di bo manipulacion y engaño.
Kiezersbedrog di Eman, Schwengle y Visser
Awor esaki no ta tur pasobra Alex Schwengle y Richard Visser kendenan tabata number 8 y 9 riba lista di AVP y tabata esnan cu mester a drenta Parlamento. Wel guess what pueblo. Nan tambe a nenga nan posicion y pues ambos a comete KIEZERSBEDROG. Pues Mike Eman, Alex Schwengle y Richard Visser a comete kiezersbedrog. Ta bon pa pueblo sa cu ta door di e engaño aki Jennifer Reyes, Michael Lampe y Marlon Alfred Sneek kendenan tabata number 10, 11, 12 riba lista esta cologa na rabo di carambola a haña un lift pa drenta Parlamento. Banda di KIEZERSBEDROG aki nos mester menciona cu Mike Eman y AVP a laga Aruba den un estado di “coma”.
Elimina BBO y aumenta edad di pensioen
Mike Eman su campaña di ‘Elimina BBO” tambe ta un farce y a comete kiezersbedrog cu esaki tambe. Mike Eman su promesa di mantene pensioen na 60 aña anto manera ladronnan den anochi a core aumenta esaki na 65 aña tambe ta kiezersbedrog. Banda di tur e manipulacionnan aki Mike Eman a redobla e debe di pais Aruba gritando den Parlamento cu e ta orguyoso di e debe y e debe t’ey pa nos tur pag’e den futuro. Esaki no ta basta pasobra ta mesun Mike Eman a redobla interes di pais Aruba unda awe Aruba mester paga den 2019 un total di 230 MIYON florin solamente na interes riba placa presta door di AVP cual ta mas di 600 mil florin pa dia. No por lubida con Mike Eman a fiesta su cumpleaños 1 di September 2017 riba e brug na Spaans Lagoen cual a costa 142 mil riba un solo anochi. E homber chikito cu un minimum loon mester traha 7 aña pa yega e suma di 142 mil florin. Awe Mike Eman kier manifesta y pidi pueblo confiansa? Kisas mester puntra pueblo ora e yega dilanti cas di gobierno pa “CRUCIFIK’E”. No bin plee victima awor y tampoco gaña pueblo cu awor diripiente bo tin tur solucion.
Parlamentario Endy Croes ta termina bisando cu dolor na curason ta con por tin hende sin escrupulo na e manera aki. Pueblo nunca pero nunca mas vota AVP.
