BAN EDUCA NOS MES PA NOS HAYA SA MAS TOCANTE DI AUTISMO
Oranjestad: Minister Xiomara tabata presente na cendemento di luz blauw ‘Light It Up Blue’ dilanti Bestuurskantoor riba dia 2 di April, e dia cu Nacionnan Uni a declara Dia Mundial riba consientisacion di Autismo.
Riba e dia aki, rond mundo ta sende luz blauw riba casnan, monumentonan, edificionnan of cualkier otro punto di referencia pa enfoca atencion riba personanan cu tin Autismo. E ceremonia di cendemento di luz blauw cu Fundacion Autismo Aruba ta organisa tur aña, ta conta cu sosten di nos gobierno. Minister di Finansa, Asuntonan Economico y Cultura a bisa cu nos aki na Aruba ta mustra solidario cu e accion aki y awe nochi nos tey presente pa asina stimula e aceptacion y sosten na e personanan cu e trastorno den e Spectrum di Autismo (ASD).
Segun estadisticanan mundial di cada 1000 persona 5 ta cay den e Spectrum di Autismo. Ta hopi importante pa nos comunidad educa nos mes, pa asina nos por reconoce e personanan cu ASD for di tempran, pa nos por yudanan pa nan tambe por funciona na cas, na scol y na trabou. Ya cu e personanan aki tambe tin mesun derecho cu cualkier otro cuidadano.
Cu e sendemento di luz blauw aki, ta un forma pa gobierno mustra su sosten pa consientisa nos comunidad riba Autismo especialmente durante luna di April. Minister Xiomara ta gradici Fundacion Autismo Aruba pa e trabou cu nan ta haci pa yuda consientisa y educa nos comunidad pa cu Autismo. Ban acepta, educa y sostene e personanan den Spectrum di Autismo pa nan tambe por funciona den nos comunidad, e mandatario a termina bisando.
