April ta e luna internacional di conscientisacion di autismo, cu ta un trastorno neurologico compleho, cu generalmente ta dura henter un bida y ta un parti di un grupo di trastorno conoci, manera trastorno di spectrum autista. Parlamentario Sue-Ann Ras tambe ta join e movimento di e Fundacion Autismo Aruba, cu kier educa grandi y chikito tocante e condicion aki, cu en realidad ta sigui aumenta mundialmente y Aruba no ta un excepcion. Segun e organisacion Autism Speaks, actualmente ta diagnostica 1 di cada 68 individuo cu autismo y 1 di cada 42 mucha homber, haciendo esaki e malesa mas comun cu e casonan di cancer, diabetes y SIDA combina.
AUTISMO MESTER TA NOS RESPONSABILIDAD
“Intencion ta pa e dia y e luna aki crea un movimento, destaca y pone enfasis riba e necesidad di mehora y yuda e condicionnan di bida di e personanan, cu ta combibi cu autismo. Nos tin cu rindi homenahe na e mayornan di cual nan yiu ta padece di autismo, cu diariamente ta lucha pa sali dilanti, pero tambe nos tin e responsabilidad di educa nos comunidad y brinda tur esunnan cu autismo un oportunidad”, parlamentario Sue-Ann Ras a cuminsa bisa.
Na mes momento e parlamentario ta indica cu ta di lamenta, cu te ainda na Aruba no tin dato specifico tocante e cantidad di hende. Pero si tin hecho cu ta basa riba e estudio di prevalencia di dr. van Balkom, unda ta indica cu na Aruba di cada 1000 persona, 5 ta den e spectrum di autismo. Mas ainda, dos di e cinconan tin autismo clasico. Nos mision mester ta simpel: yuda brinda e servicionan excepcional na e personanan cu autismo, incluyendo nan famia, pa nan tin oportunidad igual di participa plenamente den nos comunidad.
INVESTIGACION FUNDACION AUTISMO ARUBA
Recientemente Fundacion Autismo Aruba (FAA) a bin cu un encuesta representativo, pa midi e conocemento y conscientisacion riba Autism Spectrum Disorder, ASD y haya sa e ‘buraconan’. E investigacion di FAA ta den man di dos studiante di Coastal University Carolina; Lizeth Alcantara y Matthew Eichenlaub, cu ta den nan pasantia na FAA. Nan ta haya guia di miembro nobo di directiva Carolina Span. For di e encuesta aki lo por pone un base con conoci comunidad di Aruba ta cu Autismo y ta un formato cu ta permiti haci comparacion cu otro pais. Pa otro siman FAA lo duna presentacion di e resultado y asina por haya un mihor bista ki maneho riba tereno di conscientisacion en general ta mas apropia y efectivo.
“E luna aki no ta solamente pa e famianan cu ta combibi cu un diagnostico di autismo, e luna aki ta pa nos tur, paso ta nos deber como ciudadano pa combibi cu e diversidad di mundo cu ta rondona nos. Un diagnostico no ta defini un persona, pero si e oportunidad y derecho cu e tin, pa ricibi e servicionan integral trempan, cu ta facilit’e of yud’e desaroya su capacidadnan na su maximo potencial particular”. Ras a finalisa bisando.
