Siman a habri cu bishita di Embahador di Union Europeo sr. Jerney Videtic y Hefe di Cooperacion sr. Karel Lizerol, relaciona cu varios proyecto cu Aruba ta purba logra cu Union Europeo ta financia. Entre otro e financiamento di e facultad nobo na Universidad di Aruba SISSTEM: Sustainable Island Solutions through Science Engineering Technology Mathematics. Aruba ta haya 13.05 miyon Euro for di Fondo di Desaroyo Europeo pa realisa e proyecto aki. E no ta un fiansa, sino un regalo pa nos Pais.
E acuerdo financiero a wordo firma diamars ultimo hunto cu Profesor Pieters di Universidad di Leuven (KULeuven) y sra. Rosemary Lall, representante di Programa di Desaroyo di Nancionnan Uni (UNDP) y cu esaki Universidad di Aruba ta bay haya un facultad nobo pa nos hobennan por prepara den e materianan tecnico, y asina nos forma nos profesionalnan di futuro.
Tambe nos ta den deliberacion cu Union Europeo pa financiamento den caso di e crisis migratorio di Venezuela. Ya caba Union Europeo a financia e Mo-B Bus di innovacion cu ta pasa varios scol pa siña nos hobennan cera conoci cu tecnologia. Den apenas algun luna mas di 2000 hoben a subi e Mo-B Bus. Gabinete Wever-Croes ta sigui estrecha lasonan cu tur instancia internacional pa hiba nos pais padilanti.
Universidad di Aruba siman pasa a organisa e Conferencia Academico “Sharing Stories of Island Life, Governance and Global Engagement” den cual tin participacion di varios universidad den nos region y asina pone Aruba riba mapa internacional academico tambe. Den su discurso Prome Minister a comparti e storia di Aruba, di nos forsa di CREATIVIDAD y INNOVACION cu a yuda nos despues cu Lago a cera na 1985 pa nos a crea e sector turistico asina exitoso. Awe nos ta enfrenta retonan similar y nos ta demostrando e creatividad y innovacion pa saca nos pais padilanti. Y den e proceso aki INTEGRIDAD ta hunga un papel hopi importante awendia. E ta e factor mas importante pa un isla chikito por prospera. Contento di por a comparti nos vision riba INNOVACION y INTEGRIDAD cu comunidad academico di Caribe.
Maestronan siman pasa a demostra nan preocupacion pa cu siguridad den scolnan. E manifestacion a bay hopi trankil y den ambiente di paz. A prevalece dialogo y a acorda pa forma un comision pa finalisa e protocolnan cu ta papiando di dje hopi aña caba, pa asina bin cu recomendacion pa un cultura di no violencia.
Mientras tanto e Plan Educacion Nacional 2030, cu ta un plan pa 10 aña, a keda finalisa y lo wordo publica pronto.
Mientras tanto tin mas peticion pa asilo ta wordo entrega y a introduci un maneho mas efectivo y eficiente, conforme proceduranan internacional, pa trata peticionan di asilo, pa por evalua y constata rapidamente si nan tin base real. Asina entre otro por rapidamente trece claridad si un peticion tin merito of no, y na mes momento evita uzo indebido di procedura di asilo. Lamentablemente nos a constata cu tin varios aplicante ta haci uzo di e procedura importante aki sin base. Na Aruba nos ley y reglanan ta sigui aplicable. E situacion na Venezuela ta dificil y nos ta convivi, sinembargo na e momento aki nos mester pone Aruba prome.
Desde cu Nacionnan Uni a identifica e 17 metanan pa 2030 pa crea un mundo miho, nos Gobierno ta trahando cu e asina yama SDG’s. E siman aki e coordinador residente di Nacionnan Uni pa entre otro Aruba sra. Marina Walter tabata na Aruba y a reuni cu Gobierno. Sra. Walter tabata impresiona pa e forma con Aruba ta trahando. Cu e SDG’s Nacionnan Uni a scoge e “Human Centred Approach” cu kiermen pone e ser humano central y esey ta e vision di nos Premier y nos Gobierno.
Siman pasa Gobierno a despedi di sr. James Grimes di US Customs Border Patrol (CBP) kende a labora pa 6 aña y mey na Aruba y awor lo bay bek pa sigui cu su labornan na Baltimore, USA. Nos ta gradici sr. Grimes pa su trabou y tambe e aprecio pa nos Pais.
Gobierno y Serlimar a reuni cu companianan di maneho di desperdicio di Corsou y Boneiro. Durante di e reunion a comenta diferente punto manera e oportunidadnan pa traha hunto den region. E directornan presente tabata hopi interesa den e plannan cu Aruba ta ehecutando y tambe ta considera Aruba como lider den e trayectoria pa locual ta maneho di desperdicio. Tin hopi oportunidad pa traha hunto, specialmente ora cu trata di economia circular. Pero tambe den e trayectoria cu Aruba a encamina pa locual ta ‘waste to energy facility’ cualnan a gara atencion di directornan.
Diarason, conhuntamente cu representantenan di FCCA, a bishita e proyecto di cas situa na Tanki Leendert. E proyecto aki ta uno special, pasobra e ta e prome proyecto cu FCCA ta construi cu material diferente cu no ta envolvi bloki. FCCA tin como meta pa cuminsa construi casnan menos costoso, pero di calidad! Riba mesun dia a bishita un otro proyecto di cas di FCCA cu a termina y ta situa net patras di MFA Sta.Cruz. Un proyecto di cas cu a keda sumamente bunita paden y pafo. E casnan aki lo ta disponibel pa nos grandinan di 55 aña bay ariba.
Diahuebs mainta a tuma luga un momento hopi special y historico. Gobierno, DOW y Serlimar a firma acuerdo pa adkiri ekipo pa miho maneho di desperdicio. Particularmente pa desperdicio medicinal, animalnan morto y sludge. Gabinete Wever-Croes a pone su dilanti pa pone e ser humano central, como parti di esaki desde inicio di e gobernacion a haci diferente esfuerso pa logra e meta pa Aruba tin un miho maneho di desperdicio considerando e situacion di dump cu pa hopi aña ta uno anti-higienico, peligroso, dañino na nos medio ambiente y contra normanan mundial di salud. Comunidad por mira cu cada bes stapnan grandi ta wordo haci pa logra e meta aki.
Gobierno a reuni cu varios persona clave cu tin di haber cu e deporte di velocidad, pa asina nos por yega na un solucion pa cu e maneho di e pista di palomarga. Presente den e reunion tabata representantenan di Drag, Drifting, Motorcross y Go Kart. Di parti Gobierno a scucha varios opcion di esnan presente y na final, Gobierno a presenta e idea di lanta un federacion cu lo para responsabel pa cu e maneho di e pista di Palomarga, y pa coordina e diferente caredanan cu lo tuma luga. E idea a wordo bon acepta y awo ta keda na cada persona envolvi pa coopera y realisa esaki.
Siman pasa a cende e luznan LED na Veld di Kudawecha oficialmente, cumpliendo cu e maneho pa percura pa veldnan deportivo tin iluminacion.
Pa prome biaha den historia, Aruba lo tin un Plan Nacional di prevencion di salud. Den siman tawata tin un workshop di dos dia caminda Departamento Salud publico, PAHO y tur otro stakeholders a intercambia pensamento pa por ehecuta e plan nacional di prevencion.
Siman pasa a anuncia cu e stashinan di caminda di cruz di Kapel di Alto Vista lo wordo renoba, y lo wordo financia cu fondonan di Ministerio di Turismo.
Den e Pre-Event pa tur e nominadonan di Premio Excelencia den Deporte 2018, hopi atleta y prensa a gosa di un anochi ameno. Ta di remarca cu esaki ta e prome biaha cu ta organisa un Pre-Event di Premio Excelencia den Deporte. E anochi di Premio y Gala lo tuma luga dia 12 di april 2019 den Marriott Ballroom y lo wordo transmiti Live for di TeleAruba.
Minister di Asunto Social tabata na Hulanda y a tene varios reunion, entre otro cu FIER, su establecimento y nan forma di traha contra agresion y abuso den relacionnan di pareha y/of familiar. FIER ta yuda homber y muhe, grandi y chikito. Gobierno ta explorando un acuerdo di cooperacion cu FIER pa nos por aplica nan experiencia y experticio na Aruba, adicionalmente na e cooperacionnan existente.
Tambe a reuni cu UNICEF, cu ta un partner importante den e Crisisplan Social. Recientemente e prome raportahe a tuma luga. Pa e ocasion aki UNICEF a bin Aruba y tabata activo den e raportahe. A base di esaki, riba diabierna, UNICEF a presenta algun recomendacion na Gobierno con pa haci e avancenan cu ya a logra, duradero y sostenible.
Tambe a reuni cu Instituto Hulandes pa Hobennan esta Nederlands Jeugdinstituut. Un instituto cu ta forma parti di e ‘opvoedcommissie’ instala pa Reino, cu tin como meta educacion di mucha den su bida diario.
Diamars a reuni cu Minister Wouter Koolmees. Hulanda y Aruba a firma un acuerdo unda cu lo coopera cu otro pa sigura cu cada ciudadano cu ta riba asistencia social, ta haya locual cu realmente e tin derecho riba dje.
Nos a cera siman cu un reunion cu ehecutivonan di IMF na final di nan bishita na Aruba na ocacion di nan ‘Article 4 Mission’. E reunion tabata uno bon na unda nos a repasa nan resultado preliminar di e evaluacion financiero y economico di nos Pais. E siman aki e resultado preliminar lo bira conoci.
Cu e mesun animo y determinacion Gabinete Wever-Croes ta sigui traha pa trece bienestar y progreso pa cada ciudadano di nos pais.
