ORANJESTAD – Na Aruba ta parce cu tin persona ta tuma e trabou di Parlamentario manera un wega of simplemente no ta compronde nan debernan. Un organo cu tey pa controla y percura cu Pais Aruba progresa, ta haya su mes cu personanan cu simplemente ta sinta riba un stoel pa laga su mes ser uza pa gobernantenan cu no tin Aruba na pecho. Segun Minister Dangui Oduber, mandatario encarga cu Salubridad Publico, e mesun hendenan aki kier awe critica e trabou cu Gabinete Wever-Croes ta haciendo pa drecha e negligencia medico cu AVP a laga atras.
Recientemente a sali un publicacion caminda Parlamentario Mervin Wyatt-Ras tabata tin e curashi pa cuestiona e trabou cu Minister Dangui Oduber a bin ta haciendo den apenas 1 aña y mey di gobernacion. “Net esun cu menos a haci tin mas di bisa. Un Parlamentario cu a sinta wak con su mesun partido ta masacra Salubridad Publico di nos Pais y no a haci nada. E mesun persona cu a aproba y permiti un proyecto costoso y di mal calidad pa Hospital di Aruba, kier awe exigi pa den poco tempo drecha tur cos. Un persona cu ta culpabel cu awe pueblo tin cu pasa 110 MIYON florin extra caba pa un proyecto di hospital cu no bal e placa. Cu e 110 miyon florin extra aki cu pueblo tin cu paga, nos por a construi un hospital extra, busca tur specialista, busca tur enfermero y mehora nos cuido.
Mi pregunta ta, unda señora Wyatt-Ras tabata tur e tempo cu su gobierno a duna pueblo kruimels mientras otro ta bay cu henter e pan? E ta compronde su debernan como Parlamentario?”, Minister Dangui Oduber a bisa.
E mandatario a splica cu desde inicio di Gabinete Wever-Croes, su prioridad como Minister encarga cu Salubridad Publico tabata, ta y lo keda, pa eleva e calidad di cuido medico na Aruba. Minister Dangui Oduber: “Den apenas 1 aña y mey di gobernacion, a logra entre otro pa bin cu ambulance nobo. Nos a pone 60 miyon florin pa inverti den Imsan caminda lo por atende 400 pashent di cancer pa aña aki na Aruba mes. A muda oficina di HAP (Huisarstenpost) pa edificio nobo di Hospital y amplia e orario, bahando asina e presion for di riba SEH. A logra pa hunto cu AZV pone placa disponibel pa enfoca riba prevencion y crea un aplicacion di telefon unda por duna rating na dokternan di cas pa mehora nan servicio y hopi mas.”
Minister Dangui Oduber a duna di conoce tambe cu tin basta proyecto pa Salubridad Publico canando pareu, entrenan esun di AruBig, cual lo brinda oportunidad na yiunan di tera cu ta profesionalnan mediconan cu a studia den region pa traha aki na Aruba. Ta trahando pa introduci AruBig na juli di e aña aki. Otro proyectonan cu tin andando ta revision di Ley di AZV, FACT team pa soluciona problema di adiccion y problemanan mental, introduccion di un programa di rehabilitacion pa droga adiccion, introduccion di mas personal pa SEH, evaluacion pa manda pashent Miami na luga di Colombia y acreditacion di JCI pa Imsan.
Finalmente e mandatario a bisa cu pa loke ta trata e proyecto di expansion y renobacion di hospital cu e gobierno anterior a haci, lo laga haci un investigacion forensico y pone responsabel esun cu mester pa tur e desaster cu nos cuido medico a sufri na hospital.
