Drs. Mervin Wyatt-Ras a tuma nota cu minister Glenbert Croes a trece padilanti cu e lo continua cu e proyecto di sociale vorming. Un proyecto cu a cuminsa den gobierno anterior di AVP. Bou encargo di minister presidente anterior Mike Eman a pasa e ley pa reglamenta sociale vorming. Na oktober di 2011 e ley aki a ser aproba den Parlamento unanimamente. Den e ley ta regla cu hobennan di edad di 18-24 anja cu no ta bai skol mas of no tin mucho perspectiva por haya oportunidad pa haya un trayecto di opleiding como di formacion pa asina un dado momento nan por continua den comunidad. Ta ridiculo pa tende cu e gobierno actual y e minister encarga cu asuntonan social Glenbert Croes ta declara cu awor cu Aruba ta pasando den temponan dificil dor di crisis social ta bin cu e proyecto. E ta haci comosifuera cu AVP a ocasiona e crisis aki mientras cu ta su gobierno cu crisisheffing y otro medidanan, manera cambio di sistema di impuesto riba lomba di pueblo a hinca nos pueblo den crisis financiero y pobresa. Ademas e minister aki ta haci comosifiera cu den gobernacion anterior tabatin negligencia social. Si e gobierno di AVP no a bin cu e proyecto aki e por bisa cu tabatin negligenca social pero netamente AVP a entama e proyecto aki hopi anja pasa, esta na 2011. Ta Glenbert Croes y su gobierno a cancela e proyecto aki pa un anja largo. Pues den e gobierno actual hobennan no tabatin e oportunidad pa sigui cu e proyecto di AVP
y a wordo neglisha pa motibonan politico. Awor e minister aki ta haci comosifuera cu e ta esun cu ta bin cu ayudo pa e hobennan aki, comosifuera niun hende no a haci algo promer. E kier pronk cu pluma di otro. Esey ta un mentira flagrante. Pesey mes Wyatt-Ras ta kere cu ora bo como mandatario trece algo padilanti bo mester wak con bo ta formul’e y no bin cu mentiranan paso nos pueblo ta un pueblo informa y culto. E proyecto aki a duna posibilidad y oportunidad den Gabinete Eman 1 y 2 na hopi hoben pa wordo forma. Tabatin grupo di 20, tin biaha menos den curso di e trajecto pero en todo caso e hobennan aki a haya e oportunidad. Por a tuma nota di e hobennan y nan mayornan cu tabata hopi satisfecho di e resultado di e proyecto aki y di tur loke e proyecto a brinda.
Awor aki pa bo tende cu e mandatario aki ta priminti cu ora e hobennan caba cu e trajecto nan lo por bai traha na diferente caminda manera CEA, KIA, KPA, APA y Airport Aruba. Esaki ta un otro mentira di e minister y su Gabinete. E ta priminti nan algo cu e no ta bai cumpli cun’e. Pasobra tur e diferente instancianan aki p.e. Cuerpo Policial, KIA, etc. bo tin cu pasa e.o. test pa drenta. Tur e diferente instancia tin nan mesun procedura. E hecho cu e minister ta priminti e hobennan for di awor caba cu nan lo haya trabou no ta cuadra cu realidad. E minister aki mester stop di ganja y priminti sin cumpli. Alavez e tin cu duna Cesar loke ta di Cesar y admiti tambe cu ela faya. Hopi hoben a keda riba caya durante e gobernacion di Glenbert Croes pasobra durante un anja e hobennan no a haya chens pa haya guia y awor e minister ta bin haci comisifuera cu te ta bin cu solucion. E mester cuminsa cu para na Aruba. Parse cu e tambe a bai Hulanda tempran pa warda e celebracion di Arubadag. Pueblo mester wak cu un gobierno mester ta pa su hendenan y traha pa proyecto di su hendenan pero tambe na momento cu tin algo cu ta bon e mester admiti cu e algo ey ta bon. Pesey mes tambe nos tey pa refresca e memorianan pa haci posibel cu e proyecto ta continua. Wyatt-Ras ta declara di ta contento pasobra pueblo merece pa e proyecto aki continua. E gobierno aki tin 17 miyon pa e anja aki pa inverti den sector social. Wyatt-Ras ta spera cu e placa aki berdaderamente lo por ser inverti den esnan cu ta den necesidad y no den viahenan of paseonan. CFT tambe a mustra su preocupacion pa loke ta trata e fondo pa administra e placa. E minister mester stop di priminti y tin cu cumpli. El a priminti cu e lo hisa salario minimo y no a his’e. Ela priminti cu e lo bai duna hende trabou na CITGO y e no a cumpli. Ela priminti cu elo baha edad di pensioen, mientras e no a cumpli. Awor e ta priminti e hobennan cu finalisa e proyecto di sociale vorming cu nan lo haya trabou, locual probablemente e no lo cumpli cun’e . E mester stop di ganja pueblo y traha en berdad pa nos pueblo aki na Aruba y no viahando den avion pa asina nos pueblo por mira progreso y
pa nos hubentud tin un mihor perspectiva pa futuro.