Dentro di poco Parlamento di Aruba lo trata e concepto di ley nobo pa loke ta trata supervision financiero (LAFT). Fraccion di MEP na inicio di nan trabou den Parlamento a busca diferente conseho huridico, entre otro serca Dr. Rycond do Nascimento. Den dicho conseho ta wordo confirma cu Mike Eman y fraccion di AVP, door di a firma e protocol di 2015 y vota na fabor di e ley di supervision financiero (LAFT) na 2015, a entrega nos autonomia.
CONSEHO DI RYCOND DO NASCIMENTO
Den su conseho sr. Do Nascimento ta accentua cu e ta haya hopi remarcabel cu gobierno anterior, encabesa pa Mike Eman, no tawatin e curashi pa atende cu e situacion financiero nan mes. Teniendo na cuenta tambe e hecho cu na 2014 a haya un Koninklijk Besluit pa mal maneho financiero y “ondeugdelijk bestuur”.
Den su conseho e ta remarca tambe cu tanto Gobierno y Parlamento anterior, cu un mayoria absoluto di AVP a scohe pa duna autoridad na Hulanda riba finansas publico, cual ta un aspecto autonomo di pais Aruba. Esaki apesar cu “raad van advies” a conseha cu esaki ta empugna cu nos constitucion y “Statuut”.
Ademas e ta sigui pa splica den su conseho cu articulo 51 y 52 di nos “Statuut” a wordo malhusa den e caso specifico aki. Esaki door cu Gobierno y Parlamento anterior di pais Aruba, a entrega autoridad autonomo na gobierno di Reino sin cu tawatin mester.
PA CONCLUI
E conseho di entre otro sr. Do Nascimento ta confirma e hecho bon cla cu e ley di supervicion financiero (LAFT), cual solamente partido AVP a vota pe ta empugna cu “Statuut” y nos constitucion.
Manera fraccion di MEP a bin ta splica varios biaha, na momento cu trata e ley aki den Parlamento lo percura pa drecha e aspectonan constitucional. Adicional atraves di nos tarea di control ta aporta pa drecha finansas publico di pais Aruba tambe. Y riba e ultimo aspecto a entrega 2 mocion, cual por cierto a wordo ehecuta tambe door di gobierno.
Gabinete Wever-Croes na un manera responsabel ta drecha e desaster financiero y constitucional crea door di Mike Eman.