Sabana Berde – Diamars atardi a surgi un situacion momento cu famia y/of amigonan a bay bishita personanan indocumenta deteni na Guarda Nos Costa na Sabana Berde.
Diamars atardi por a mira basta hende para pafo na base di Guarda nos Costa na Sabana Berde. Nan lo a bay haci bishita cerca esnan cu ta cera eynan, y cu lo ta pendiente nan deportacion.
Pero e momento eynan, aparentemente sin ningun previo aviso a wordo bisa cu no tin bishita awe !
Esaki no a cay den bon tera cerca esnan pafo, tanto stranhero y local.
No a duna informacion e pakiko no por drenta y mira e detenido.
Guarda Nos Costa ultimo dianan ta den hopi publicidad. Guarda Nos Costa ta haciendo un bon trabou, pero na e mesun momento ta mustra cu tin poco confusion tambe.
Dialuna anochi informacion a “leak” cu detenidonan tawata ser laga den “libertad”, pero lo mester meld tur dia na un ora stipula. Lo a keda di reuni cu Prensa diamars pa duna mas informacion tocante e cambia abrupto aki, pero no a scucha mas di esey.
Varios di e personanan aki a haya un negatief advies relaciona cu nan peticion pa Asilo y ta cera pendiente deportacion.
Y diamars diripiente na Sabana Berde no por bishita esnan deteni, loke a causa disgusto.
Dialuna anochi a laga indocumentanan liber, pero diamars durante dia Guarda Nos Costa a sigui cu su accionnan, y ta detene varios persona. Por a mira e Van yen yen.
Segun nos a compronde e detencionnan lo tawata na sitio di construccion. Diamars GNC a sigui un pick up y na altura di Paradera Party Center ta logra detene un homber indocumenta cu lo tawata traha na sitio di construccion na Purun.
Algun tempo atras GNC a tene razia na e mesun area aki, unda ta construyendo casnan. Pero ta mustra cu un biaha mes e contratista ta usa personanan indocumenta pa haci trabou di construccion.
Ariba e imagennan por mira e gestonan di esnan deteni.