Despues di intervencion cu Gobierno di Aruba a haci cu autoridadnan mericano, dos siman pasa a obtene e General License #7a. Den e licencia aki, nan ta declara cu e refineria na Aruba tin e espacio pa lanta e fondonan cu tawata destina pa fase dos cu actualmente ta blokea pa motibo di ultimo sanccionnan.
Dia 14 di maart, e General License #7a a worde otorga bou peticion di Gobierno y awo e fondo por wordo lanta, pero, Prome Minister Evelyn Wever-Croes ta enfatisa, tin condicionnan mara na esaki. Cua condicionnan na e momentonan aki ta bou descusion di Citgo pa motibo cu nan no kier cumpli cu e condicionnan aki.
Office of Foreign Assets Control (OFAC), a confirma na Gobierno di Aruba cu e General License #7a ta skirbi pa Aruba por continua cu fase dos manera cu Gobierno a pidi y pa medio di e notanan manda pa nan, a convence nan pa otorga e peticion haci.
“Basa riba e informacionnan ricibi di Citgo mes, Gobierno di Aruba a manda e notanan pa OFAC y asina a wordo otorga e General License #7a”, Prome Minister a duna di conoce.
Na e momento aki, esaki ta den man di abogadonan pa asina percura pa Citgo sinti e confortabilidad pa manda e placa pa asina e fase dos so por keda cla cu e fondonan aki.
Prome Minister a enfatisa cu e placa aki no por yega den man di PDVSA, Citgo y den man di ningun di e personanan cu ta menciona den e lista di sanccion.
Reunionnan ta andando cu abogadonan di banda di Citgo, OFAC, y pa Aruba, e consehoronan envolvi pa pronto por keda cla cu tur detaye pa Aruba haya e placa aki y cuminsa cu fase dos y pone trahadonan bek na trabou.