Ministerio di Desaroyo Teritorial, Infrastructura y Medio Ambiente conhuntamente cu e team ehecutivo di Serlimar, tabatin un encuentro ameno y fructifero cu e companianan di maneho di desperdicio di Corsou (Selikor) y Boneiro (Selibon).
Durante di e reunion a comenta diferente punto manera e oportunidadnan pa traha hunto den region y e forsa cu ta sali di traha hunto. E directornan presente tabata hopi interesa den e plannan cu Aruba ta ehecutando y tambe ta considera Aruba como lider den e trayectoria cu a cuminsa encamina pa locual ta maneho di desperdicio. Tin hopi oportunidad pa traha hunto, specialmente ora cu trata di economia circular y diferente aspecto relaciona cu esaki. Pero tambe den e trayectoria cu Aruba a encamina pa locual ta ‘waste to energy facility’ cualnan a gara atencion di e directornan.
Den e proximo dianan lo sigui papia di e posibilidadnan di colaboracion.