Periodistanan tin un tarea importante den nos comunidad, esta di trece informacion fidedigno dilanti na nos comunidad. Informacion fidedigno ta pa yuda informa un comunidad di e realidad di cierto situacion cu ta tuma luga.
Ta tristo cu e mesun mentalidad cu a neglisha y sconde e realidad social di nos isla pa casi un decada, awe kier grita cu e Plan di Crisis Social supuestamente no ta na nivel di e crisis social na nos pais. Cu apenas 7 luna cu a cuminsa ehecuta e Plan di Crisis Social, cierto periodistanan cu a permiti pa e gobierno anterior neglisha tur aspecto social den nos comunidad, awe kier bin critica. Ta e mesun periodistanan aki a mira con muchanan y demas hende inocente a sufri durante di gobernacion di AVP sin cu esaki a conmove nan suficiente pa scirbi un editorial of filma un video e tempo ey?
Ta e mentalidad aki ta mesun mentalidad cu a apoya y sconde e desaster financiero di Aruba, hincando pais Aruba den un debe cu ta surpasa 90% di GDP, pa awo tin e pudor di yama pa un protesta nacional? Tristo ta cu e mesun maneho desastroso cu e periodistanan a yuda apoya durante e periodo di 2009 pa 2017, a aporta grandemente na e problemanan social economico cu nan ta menciona.
Ta di aplaudi cu e periodistanan mes ta menciona e magnitud di e crisis social, pero no ta husto pa pretende cu e crisis social mester keda resolvi den apenas 7 luna desde cu Parlamento a aproba e presupuesto di SCP na augustus 2018. Nos kier a confirma cu enberdad e crisis social ta uno severo, pero si cada miembro di nos comunidad duna un aporte genuino, lo por yuda trece alivio mas lihe cu ta posibel na esnan cu mas mester di esaki.
Pa e periodistanan aki no ta importante cu tin profesionalnan den e tereno social, husticia, enseñansa y salubridad cu ta trahando inmensamente duro riba e Social Crisisplan. E plan social aki ta inclui mas di 30 entidad gubernamental y no gubernamental y ta wordo ehecuta cu apoyo tecnico di UNICEF. Loke obviamente ta importante pa e periodistanan aki ta sigui engaña e pueblo pa sigui yuda nan gang di AVP purba destabilisa un gobierno cu porfin a pone e aspecto social riba un prioridad halto.
Ta keda nos pa invita e periodistanan aki pa lesa e Plan di Crisis Social ya cu nan a demostra ignorancia grandi pa loke ta e trabou riba tereno social y tambe e strategianan y obhetivonan di e Plan riba su mes..
