ORANJESTAD – Dialuna mainta Minister di Salubridad Publico sr. Dangui Oduber a haci apertura oficial di e workshop di PAHO (Pan American Health Organization) hunto cu DVG (Directie Volksgezondheid) cu ta dirigi riba un plan nacional di prevencion. Tur stakeholders concerni tambe ta presente na e workshop aki cu lo dura 2 dia y lo enfoca riba malesanan di NCD’s (non-communicable diseases).
Minister Oduber den su presentacion a papia un tiki riba e datosnan cu e la ricibi den su encuentro cu e nefrologo na Aruba na aña 2018. Segun e mandatario e datos nan a lage den shock, esaki debi cu 16.2% di Aruba su población ta sufri di diabetes y esaki ta casi dos biaha mastanto cu e porcentahe global di 8.3%. Un otro dato cu a capta e Minister su atencion ta e datosnan di dialyze cu tambe ta a consecuencia di e malesa di diabetes. E mandatario a duna di conoce cu 1 pashent di dialyze ta costa AZV 100 mil florin pa aña, na Aruba actualmente tin 200 pashent y e cifra ta aumenta cu 24 pa 30 pashent pa aña. Aki ta papia di un costo anual pa AZV di 20 miyon florin na dialyze solamente. Mas aun e cifranan di morto ta mustra cu e causa principal di morto prematura ta relaciona cu malesanan di NCD’s manera cancer, diabetes, cardiovascular, stroke y respiracion cronico.
E mandatario a splica cu su vision ta pa promove un miho cuido medico pero tambe un miho calidad di bida pa e población di Aruba. Pa realisa e vision aki ta importante pa bin cu un plan nacional preventivo riba e NCD’s. Pa añanan nos systema di cuido medico ta inverti den medicamento y e costo di esaki ta keda aumenta mas y mas. Y esaki ta un otro motibo pakiko e gobierno aki ta compromete su mes na duna atencion real na e parti preventivo, asina e Minister a trece dilanti.
Pa prome biaha den historia di pais Aruba un Plan Nacional di Prevencion di Salud ta wordo traha. Un plan cu enfoce riba e malesanan di NCD’s, un programa pa Aruba cu sosten di PAHO. E meta tras di e plan aki ta pa preveni e malesanan aki pa asina a lo largo por baha gastonan di AZV considerabelmente.
Minister Dangui Oduber a gradici e delegadonan di PAHO, dr. Taraleen Malcolm, dr. Karen Pierre, Ms. Nicola Taylor. Tambe e Minister a gradici su departamento cu ta DVG y tur stakeholders cu a atende e workshop. E mandatario a expresa cu e ta sumamente satisfecho di por a cumpli cu un otro punto den e programa di gobernacion.