Parti di e vision di Ministerio di Desaroyo Teritorial Infrastructura y Medio Ambiente, ta pa provee casnan pagabel pa atende cu e gran necesidad di vivienda na Aruba y tambe pa stimula e mercado local y economia local. En cuanto esaki a cuminsa cu e proyecto di prijsvraag pa viviendanan den e area di Eagle.
Desde di 11 di maart 2019 tabatin e oportunidad pa cumpra e “bestek” relaciona cu e proyecto: “Woningbouw Eagle”. Diaranson 20 di maart 2019, tur persona cu a cumpra e bestek a ricibi e oportunidad pa haci nan pregunta. Dia 15 di mei 2019 tur persona cu a cumpra nan bestek mester entrega nan “kostenraming” y dia 29 di mei 2019 lo scoge e compania cu lo bay ehecuta e proyecto.
Director di DOW Marlon Croes a splica cu ora cu a saca e prijsvraag document dia 11 di maart tabatin gran interes na Aruba di esnan cu a cumpra e documento aki. E documento ta un concepto nobo cu ta encera diseña un plan di un bario residencial midi riba diferente aspecto: calidad di bida, arkitectura, estetica, balans y sostenibilidad di e casnan.
Pa motibo cu e concepto ta nobo, lo bay tene den e proximo dianan 3 ‘inlichtingsvergadering’.
Esaki ta encera cu esnan cu a cumpra e documento tin e oportunidad pa participa den un reunion cu e ekipo di DIP y DOW. Den e reunion lo por haci pregunta y ricibi contesta pa di e forma aki optimalisa e documento. Pa di e forma aki percura pa tur e desaroyadornan ta riba mesun liña cu Ministerio, DIP y DOW, tocante kico kier y ta spera di otro.
Kier stimula e desaroyador pa ta creativo den e proceso pa tin casnan den un area residencial bon balansa, bunita y na un prijs cu ta pagabel pa ciudadanonan. Sr. Croes a sigui splica cu ta calcula cu pa mitar di luna di mei e desaroyadornan lo mester entrega nan diseñonan. Mester menciona lo bay tin un comision cu ta consisti di representante di DIP, DOW, ADIAA, un miembro di sector priva y un representante financiero, pa wak e cifranan y wak si e proyecto ta realisabel of no. ‘Esun cu gana e proyecto lo pasa e tereno p’e den erfpacht pa e por cuminsa desaroya esaki y busca su financiado y contratista. Ora e construccion ta cla, e por cuminsa bende e casnan cu e personanan cu ta riba lista pa cas na DIP. E proyecto ta trata di casnan cu ta costa entre e suma 140 mil y 250 mil florin, sr. Croes a informa.
Gabinete Wever – Croes a traves di e Ministerio encarga cu viviendanan ta introduciendo e concepto di prijsvraag como un forma pa atende cu e necesidad grandi riba casnan pa diferente grupo cu pa un of otro motibo aworaki no ta bin na remarca pa cas. Un parti di Ministerio su vision cardinal ta, pa provee hogar pa nos hendenan y esaki ta un forma pa realisa esaki y alaves stimula economia local.