Alan Howell Fraccion di POR ta sostene maneho di Minister Otmar Oduber y ta aproba presupuesto di DOW

Durante reunion publico den Parlamento pa trata presupuesto di DOW pa aña 2019, parlamentario di Fraccion di POR, Alan Howell a indica cu e fraccion blauw ta contento di mira e desaroyonan positivo cu por mira rond di nos isla pa loke tat rata trabounan di obranan publico.
Howell a indica cu e minister ta cumpliendo cu e maneho di Gobierno, cu e ta bayendo den e direccion di e vision cu tin pa Pais Aruba, mescos cu e vision y mision di Parlamento, conhuntamente cu e deparamentonan cu ta cay bou di dje. “Minister Otmar Oduber ta haciendo un bon trabou”.
Continuando Alan Howell a bisa cu Gobierno a establece plannan di maneho ambicioso for di inicio di Gabinete Wever-Croes y maneho di Mininister Oduber ta cuadra cu esaki y tambe cu e vision di partido y fraccion POR. Su maneho mescos cu esun di henter gabinete ta poniendo e ser humano central.
El a expresa cu hopi habitante ta contento cu e maneho y cu barionan full rond Aruba ta hayando atencion den tempo record. “Barionan a cuminsa sinti e diferencia entre gobernacion anterior y actual. No solamente ta trata di asfalt, pero tambe atencion den manera profesional pa loke ta trata nos medio ambiente. Plannan cu a kere cu no ta posibel, e minister actual a logra hacie den menos cu 2 aña. Gobierno actual ta trahando fuertemente pa regla e zonificacion di nos pais na e miho forma, pa asina aki Aruba por ta organisa.
Minister y DOW ta bashando asfalt na un manera organisa, sin cu ta mira ki color politico tin den e bario. E minister a pone politica un banda y a pone e ser humano central. Barionnan cu pa mas di 30 pa 40 aña no a hole asfalt, den un habri y cera di wowo por a wak asfalt den nan bario.
DOW ta trahando incansablemente tur caminda, incluyendo districto di pariba di brug. Ultimo por a mira e proyecto di Rooi Master, pero tambe Mabon/Brazil y awe segun planning y na ora por mira cu DOW a cuminsa den e bario di Pos Chiquito/Burubundu. Den e gobernacion aki e pueblo di pariba tambe ta conta”, ta palabranan di Alan Howell expresa den sala di Parlamento.
El a haci un peticion na gobierno pa den cuadro di ley coopera cu tur inversionista cu kier trece un desaroyo economico pa San Nicolas y duna esnan di pariba nan fair share.
Tambe el a pidi Minister Oduber pa duna un splicacion di e ROP specialmente pa e parti pariba di brug y mas specific ainda pa e parti di Seroe Colorado unda a stipula pa bin cu un desaroyo turistico.
Alan Howell a enfatisa un biaha mas cu importante den gobernacion ta cu e maneho ta balansa y esaki ta e caso tambe. Ta traha na manera serio, ta tene nos hendenan central y ta laga politica afo. Ta worry cu e pueblo cu a falta atencion pa hopi aña y tin e procedura di First In First Out pa loke ta tereno y ta traha na un manera transparente dunando na cada un e respet cu nan merece.
Pesey Fraccion POR ta mas cu contento y satisfecho y cu mucho gusto lo sostene presupuesto di DOW di 51 miyon pa duna e minister en cuestion y e departamentonan cu ta resorta bou di dje e sosten cu ta necesario.
Na final Alan Howell a entrega un mocion unda ta urgi gobierno pa bin cu verkeersdrempels na diferente bario rond di Aruba manera ta Palisiaweg, Caya Jose Geerman, caminda principal di Mabon, Weg Seroe Preto, Mount Scenerystraat, Fortheuvelstraat, Dakota, Dadelstraat, Druivenstraat, dilanti Colegio San Hose, dilanti Colegio San Antonio, caminda di Hooiberg (cu ta conecta Hooiberg y Pavia), caminda di Jaburibari-Calabas (Parke Curason), Saliña Serca-Rotonde Marriott y Savaneta na haltura di Zeerovers mas pronto cu ta posibel pa trece trankilidad den e barionan y preveni accidentnan cu consecuencianan grave.