Den conferencia di prensa di diaranson pasa, Parlamentario Sue-Ann Ras di fraccion MEP, a trece un punto di hopi preocupacion y na mes momento indignacion, relaciona cu Sociaal Crisis Plan. For di momento cu a inicia e proceso di ken tur mester ta envolvi den Sociaal Crisis Plan, enseñansa ta un veld cu sigur mester ta completamente involucra pa por atende algun aspecto cu mester atencion. “Ta di lamenta y condena cu nos ta den e proceso di prome raportahe di evaluacion di Sociaal Crisis Plan y Departamento di Enseñansa (DEA) a briya cu nan ausencia”, Parlamentario sue-Ann Ras a cuminsa na bisa.
PROCESO
“Ni programma van eisen’, ni project update, manera tur e otro 24 instancianan si a hacie, DEA a haci. Y mester por pone un hende responsabel, paso tin 800 mil florin disponibel y niun plan” e parlamentario a enfatisa. Mientras cu den veld di enseñansa tin hopi problema social y sigur si bin cu un bon plan di maneho y cu ta relaciona cu e metanan di Sociaal Crisis Plan, por contribui hopi cu veld. Pero entregando un plan cu no ta bisa absolutamente nada y cu ta cubri a penas mitar A4, ta di lamenta y condena. Segun parlamentario Ras: “Esaki ta tipo di conducta cu nos no por acepta mas y ta algo tipico di e comportacion y reflexion di e maneho di pasado, unda ta haya un suma grandi y despues no tin control unda y con e suma a bay y e proyecto mes a keda riba papel y den lachi.”
PERIODO 2017 – 2019
For di november 2017 a sinta pa prome biaha y a manda invitacion pa diferente instancia y fundacion, DEA tambe tabata invita.
Na januari 2018 tur instancia/fundacion mester a entrega nan ‘programma van eisen’, incluyendo DEA, paso segun nan, nan no a ricibi niun mail, mientras tin prueba cu a manda mail pa nan. Sinembargo a dicidi di bolbe tuma contacto cu nan y a duna nan tur espacio pa entrega nan ‘programma van eisen’ mas pronto cu ta posibel.
For di periodo di maart te december 2018 tabatin reunion mensual, unda tabata sinta cu e instancia- y fundacionnan pa monitor henter e proceso y cu nan tin tur cos bon delinea. “Cada instancia/fundacion tabata manda un representante, mientras cu e sector di enseñansa a cambia 2 biaha ken ta presencia e reunion” Ras a indica.
Ta te augustus 2018, despues di hopi bay bin, DEA a manda un schema basta confuso pa enseñansa preparatorio y cu e resultado aki di mitar A4, unda nan a pidi pa un ‘pedagogisch beleid’ den relacion cu e metanan di Sociaal Crisis Plan. “Esaki mas cu claro no ta cuadra en absoluto cu metanan di Sociaal Crisis Plan” tabata loke Ras a expresa.
Na september 2018 DEA a contrata 2 ‘beleidsmedewerker.’ E momento ey Departamento di Asuntonan Social a manda pidi un ‘plan van aanpak’, cu ta cuadra cu e exigencia y meta di Sociaal Crisis Plan na DEA, ya cu nan tabata e unico veld cu no ta activo.
Na october 2018 a sinta incluso cu Minister di Enseñansa, DEA y e 2 ‘beleidsmedewerkster’, unda a splica den placa chikito kico mester haci. Incluso na luna di december mi mes a haci pregunta por escrito tocante esaki y a haya como contesta, cu nan ta trahando riba dje.
Pa fin di januari tur instancia/fundacion a entrega ‘Proyect Update’, di cual tabatin un formato structura y uniforme. Atrobe DEA no a entrega nada.
“Nos a yega dia 26-27-28 di februari, unda cu nos a haci e prome raportahe di evaluacion. Y nan no a entrega nada y tin e fondo di 800 mil florin disponibel. Y esaki simpelmente ta inaceptabel y un hende mester para responsabel pa esaki y mi lo percura pa esaki sosode tambe” Ras a finalisa bisando.