Ta di lamenta cu mi mester dedica poco tempo pa duna Mervin Wyatt Ras poco les, enbes cu e mester siña mi y duna mi e bon ehempel den Parlamento. Ora mi wak su relato den corant y cu ta referi na mi persona cu mester percura pa coalicion forma quorum ta un berguensa. Pasobra mi por a wak’e saca asina bunita e reglanan pero el a lubida di splica esaki den su totalidad y den mi concepto a splica esaki malo. Sea e mes no ta comprende of kizas e ta di mala fe pa trata na confundi pueblo. Mi no kier pensa mes cu tur e añanan den parlamento y sigur como ex presidente di parlamento e no ta comprende kico e tabata haci y ta p’esey tabatin asina tanto caos den parlamento. Pero mas pio ta cu mi no por kere cu e kier sigui para pa algo cu ta malo y malinterpreta pa hopi parlamentario y cu ta un bofta pa e clase trahador cu tin di traha pa paga nos salario y Mervin Wyatt Ras ta sigui burla di e pueblo chikito y humilde cu ta paga nos tur nos salarionan den parlamento
Mentira di Mervin
Durante e reunion publico di 20 februari 2019 Minister Xiomara Ruiz-Maduro a indica corectamente na presidente di parlamento cu si por schors e reunion pa 1 ora debi cu su persona tin un reunion cu e tin di atende cu tin di haber cu finanzas di pais Aruba. Corectamente presidente di parlamente Ady Thijsen a acerca tur lider di fraccion pa cu e peticion aki y tur lider di fraccion a bay di acuerdo pa e reunion sigui sin presencia di e minister ya cu su conseheronan ta suficiente pa tuma nota, mientras e ta bay bolbe y asina e reunion por continua y sin tin di perde tempo. Lamentablemente Mervin Wyattt-Ras na e momento ey no tabata den sala y kizas tabata den un SPA ta tuma poco masashi pa despues bin bek reunion y no tabata sa mes di e decision di su líder di fraccion of kizas Mervin Wyatt Ras no tabata di acuerdo cu e decision tuma door di lider di fraccion Marlon Sneek pasobra kizas Mervin ta pensa cu ta e mester ta lider di fraccion??
Splicacion y aplicacion di ley malo
Un duele mi ta haya ora un parlamentario expresa esaki: “a señala na dado momento cu tabatin solamente 10 miembro di coalicion presente na reunion y cu su persona hunto cu coleganan di AVP mester a keda den sala pa e reunion por a sigui”. E expresion aki ta un berguensa pasobra ta 21 parlamentario a huramenta pa sirbi e pais aki y ta 21 parlamentario nan obligacion di ta na trabao y sigur na un reunion publico. Cu tin 10 di coalicion, pero wak pa abo t’ey pa forma quorum pasobra e mesun Reglement van Ordo ta papia di “Leden van de Staten” y no leden van de Coalitie of leden van de AVP. Bin traha y percura pa bo coleganan tambe bin traha, pasobra ta pueblo ta soda eyfo hopi duro pa paga nos salario. E tipo di mentalidad aki ta haci cu eyfo tin e pensamento cu nos tur tin bida lekker den parlamento, pasobra Mervin y hopi di su coleganan ta duna muestra cu esaki ta e caso door cu nan no ta acudi na reunion of ta bin reunion y ta somenta despues y cu esaki ta crea e sintimento cu placa di pueblo ta ser tira afo na nos tur.
Articulo 25 ta indica hopi cla: ieder lid tekent bij het in de vergadering komen de presentielijst. Zodra meer dan de helft van het aantal zitting hebbende leden getekend heeft, opent de voorzitter, indien het uur van bijeenroeping aangebroken is, de vergadering. Adhunto cu e articulo aki mi ta manda tambe e lista di presencia pa pueblo wak un biaha mas ken ta papia berdad. Ora reunion a habri tabatin 20 miembro di parlamento presente, pues tabatin un quorum consistiendo di 20 parlamentario incluyendo 11 di coalicion.
Articulo 25 mester ta e base pa defini articulo 26 y 27
Un ehempel ta e reunion cu Mervin Wyatt Ras ta referi na dje unda cu 20 miembro a firma pa e reunion por a cuminsa, pues tabatin un quorum di 21 miembro di parlamento. Es decir cu hamas e reunion aki no por ser para pa falta di quorum na momento cu 20 miembro a firma na comienso. incluyendo Mervin cu ta ser paga pa ta presente. Y mester añadi na articulo 26 y 27: si dado caso cu no tin quorum durante un reunion cu a cuminsa cu un mayoria cu a haci acto di firma e lista di presencia, mester traha un procesverbaal pa conta y skirbi kennan ta presente y kennan no ta presente na momento cu e reunion a ser interumpi pa falta di quorum y esnan cu a firma cu no ta presente na momento di interupcion di e reunion mester kita nan dia di salario y esnan cu no a bin reunion mes y no a duna ningun motibo valido tambe lo mester kita nan dia di salario. No Work No Pay, pasobra mester disciplina nos parlamentarionan pa duna respet na pueblo cu nan ta representa y mester ta ehempel pa e proximo generacion di parlamentarionan. Mervin: Bo deber manera tur trahador ta na pia di trabao y trata pueblo cu respet.
Mervin tin di splica e significacion di miembro di parlamento
Atrobe pueblo cu por bay riba e website di parlamento y wak e reunion di 20 februari 2019. Por wak e grabacion di e reunion publico aki y wak con Mervin como un hende grandi cu mester ta ehempel pa pueblo un biaha mas ta gaña riba un Minister. Pero mas pio ta cu te ainda Mervin Wyatt Ras cu tur su añanan di experiencia no por defini kico kiermen miembro di parlamento di Aruba. Pasobra keto bay e ta keda purba busca hustificacion pa e no bin trabao of e bay dal un drumi den camber di fraccion of pa e por sali bay dal un SPA y bin bek mas laat, pa hustifica cu ta coalicion so ta miembro di parlamento. Y p’esey mester bin cu sancion severo pa esunnan cu no ta bin reunion of ta bin reunion y bay despues pa motibo cu nan no ta respeta pueblo y un reunion ta para. Mester aplica cu ta kita nan salario pasobra no por t’asina cu bo ta firma y despues bo ta bay y ta stroba un reunion y esaki ta conta pa tur parlamentario.
Pa termina ainda mi ta warda e splicacion di Mervin kico nifica miembro di Parlamento of pa Mervin ta ora e ta den exterior so e ta miembro di Parlamento? Recientemente 5 di februari 2019 Mervin Wyatt Ras a bay Surnam y ey si a forma parti di parlamento di Aruba y ey si internacionalmente el a forma quorum si of no? E mester splica nos si na e reunion aki na Surnam di IPKO el a bay den nomber di fraccion di AVP of el a bay como miembro di parlamento di Aruba? Pasobra na final di dia ta e pueblo trahador, e homber y muhernan balente y humilde di Aruba cu ta sali traha tur dia pa paga nos salario y tambe paga nos biahenan di trabao merece mas respet aki na Aruba door di atende reunionnan publico cu seriedad manera un parlamentario mester por haci como un bon trahador di pueblo.