Parlamentario Endy Croes a splica cu su mes a bay corte diahuebs ultimo pa por a presencia y scucha e caso di Utilities vs ex Directeur Hoevertsz. Manera cu AVP a sinta na november 2009 den apenas 3 siman nan a kita Directeur di Utilities y a trece nan amigo Hoevertsz como directeur. Pueblo ta corda cu ta e mesun Franklin Hoevertsz aki tabata den e problemanan cu FCCA tempo di Henny Eman den caso unda Hoevertsz como Directeur di FCCA a cumpra un Interbank den bancarota.
Un contracto miyonario
Durante tratamento di e caso Hoevertsz a wordo representa pa abogado Johan Sjiem Fat hustamente e abogado amigo di Mike Eman kende a cobra for di gobierno di Aruba y Mike Eman un bunita suma di mas di 5 MIYON florin bao gobernacion di AVP. Hoevertsz den su contracto cu AVP a firma p’e te hasta gastonan di abogado pa bringa caso contra dje lo mester wordo paga pa Utilities. Abogadonan di Utilities Thomas Aardenburg y Anthony Ruiz a splica hues cu investigacion haci por a prueba con bao di maneho di Hoevertsz y AVP explotatiekosten di Utilities a subi di averahe 400 mil florin pa aña den periodo di MEP 2001-2009 y a alcansa 3.000.000 esta 3 MIYON florin pa aña bao di maneho di Hoevertsz den periodo di AVP. Hoevertsz tabata surpasa constantemente e presupuesto di Utilities. Hoevertsz den corte a wordo acusa di un explotatiekosten total di 18 MIYON bou su maneho y segun rapport di Plus Accountant rond 11 MIYON no ta cuadra cu e ‘doelmatigheid’. Hoevertsz na multiple ocasion a haci pagonan cu a surpasa e suma di Afl. 25.000 florin cual di acuerdo cu artikel 8 lid 4 di statuut e mester un aprobacion di Raad van Commissaris promer. Segun abogado di Utilities Mike de Meza y Mike Eman mester por tabata “burachi” momento cu a firma e contracto di trabao di nan amigo Franklin Hoevertsz. Un salario barbaro di Afl. 22.000 florin pa luna plus 13de y 14de maand mas 25% toelage, auto super luhoso, telefoonvergoeding y riba dje Utilities ta paga un pensioen miyonario di Afl. 8000 pa luna p’e. Pues casi Afl. 500 mil pa aña pa un Directeur? Con Mike de Meza, Mike Eman y AVP por hustifica esaki?
Abusonan di AVP den Utilities
Riba dje 30 dia di vakantie pa aña y banda di tur esaki, investigacion a mustra cu Hoevertsz ta permanece un averahe 3 luna pa aña den exterior riba gasto di Utilities, aparentemente trahando pa Utilities. E gastonan aki tambe a suma un otro Afl. 500.000 esta mey MIYON florin. Den corte a sali na cla con Hoevertsz a paga avion priva pa e mes bay Venezuela. Hoevertsz a paga 2 biaha 19000 pounds, pues rond 80 mil florin pa Mike Eman sali den un Newsweek. Increibel. Hoevertsz a cumpra tambe e ex edificio di Dolce Vita pa Afl.1.350.000 for di SIG South east Investments group cual edificio awe TNO ta aden. Thera Group, Abogado Sjiem Fat, Horizon Consultancy (di Richard Arends di AVP), JSG Consultancy tur entre otro a cobra masha masha hopi placa for di Utilities door di Hoevertsz. Horizon Consultancy su contractonan tur firma pa Richard Arends y sin fecha. Esaki nos lo bin bek p’e. Abogado di Hoevertsz kier pretende cu mayoria pago a bay via un Ministeriele Beschikking esta (MB) di gobierno y ta legal. Abogadonan di Utilities a pidi hues pa huzga den su veredicto si e practicanan aki na e forma cu Hoevertsz a maneha Utilities tabata hustifica conforme statuto y reglanan di good governance y kico ta e castigo husto pa un mismanagement di un enbergadura asina. Hues lo dicta sentencia final 2 di april proximo. Hues a splica na final cu esaki lo por ta un “verassing” como cu e lo bay huzga e maneho conforme statutonan.