Awe ta un dia cu hopi di nos hende muhernan ta ricibi rosa, of ta haya yen di bunita mensahe y ta pone hopi dedicacion riba social media, cu ta nifica un detaye di reconocemento pa e genero femenino. Segun Parlamentario Sue-Ann Ras; “Ta bon pa enfatisa cu nos no mester perde e berdadero motibo di e conmemoracion aki y ta bon pa nos para keto na algun cifra y tambe vision, cu ta prueba suficiente, cu nos ta hopi leu ainda. E fecha di 8 di maart ta celebra anualmente como Dia Internacional di Hende Muher y ta un luna ideal pa recorda cu falta hopi ainda pa haci den igualdad di genero.”
ALGUN DATO ALARMANTE
Semper ta bon pa comparti algun di e motibonan, cu ainda mester haci tur loke ta necesario, pa conmemora e dia aki y pa traha riba un mihor futuro di genero.
- Na mundo tin alrededor di 870 miyon di persona analfabeto segun Unesco, y di esaki dos tercer ta muher, pues 65%.
- Violencia contra muher ta sigui ta un tarea pendiente y Aruba no ta un excepcion y ta mas bisto den e medionan di comunicacion. Segun Nacion Uni, 35% di muher a sufri di e tipo di violencia aki, pues 1 di cada 3 y den region di Latino America y Caribe ta 45%. Fundacion Hende Muher Den Dificultad a duna di conoce cu na 2018 a yuda 144 cliente y a duna alohamento den nan shelter na 24 señora y entre 25 cu 30 menor di edad, cu a yega hunto cu nan mama.
- Nacion Uni ta calcula cu mas di 30 miyon di mucha muher menor di 15 aña ta den peliger di ta someti na mutilacion genital femenino y mas 130 miyon ya a sufri e barbaridad aki riba nan propio curpa.
- Na mundo ta existi mas di 700 miyon di muher cu a casa ora nan tabata mucha. Di esakinan 250 miyon tabata menor di 15 aña. E mucha muhernan cu a contrae matrimonio prome cu cumpli 18 aña, tin menos probabilidad di termina su educacion y mas di sufri violencia domestico y complicacion durante parto.
MERCADO LABORAL ARUBA
E hende muhernan ta sigui ocupa e empleonan mas precario y ta representa un mayoria den mercado di trabou. Si analisa e dos sectornan di for di dato di CBS Censo 2010: comercio, hotel y restaurant (considera como 1 sector), tin alrededor di 9700 hende muher, cu ta representa 42% di e muhernan cu ta traha den e dos sectornan laboral aki. Di e total cantidad di mama cu yiu di 0-17 aña cu ta traha, 43.3% (alrededor di 4600) ta traha den comercio, hotel y restaurant.
Mas cu claro esaki tin su peso den desaroyo social emocional di un mucha, mirando cu den e sectornan aki, no tin mucho flexibilidad den orario, dia liber y orario largo di trabou, cual ta nifica, leu for di cas y cuido general di e muchanan. Sin kita afor, cu ainda e hende muher, ora e yega cas mester atende tambe e tareanan di hogar y di cuido di e muchanan, p.e. huiswerk.
Pa hopi aña ta haciendo esfuerso enormemente pa duna potencia na e rol di muher como elemento catalizador di cambio den sociedad. P’esey nos ta impulsa e liderazgo femenino a traves di diferente forma, unda nos por sinti presencia di e hende muher den e medionan, comite, institucion, conseho y asociacion. “E resultadonan sin duda ta satisfactorio, pero ainda tin hopi pa haci. Nos tin cu sigui promove e caminda pa diversidad di genero, tanto den e seno di empresa como den entorno social”, Ras a indica.
META DI DESAROYO SOSTENIBEL
Manera e lema di 2019 ta bisa: Dia Internacional di hende muher nos mester pensa den igualdad, contrui cu inteligencia y innova pa e cambio. No ta un secreto cu den cierto sector laboral, specialmente pa loke ta trata futuro, manera; ciencia, tecnologia, innovacion, infrastructura sostenibel, nos ta boga pa igualdad di genero y empoderamento di hende muher. E logro di e metanan ambicioso di Desaroyo Sostenibel ta rekeri cambio transformador, enfoke integra y solucion nobo, specialmente den loke ta concerni e defensa di igualdad di genero y e empoderamento di tur muher y mucha muher. Segun Ras: “Si nos mantene e tendencianan actual, e intervencionnan existente no ta suficiente pa haya un planeta 50-50 pa 2030”. P’esey ta crucial pa conta cu planteamento innovador di parti di gobierno como tambe sector priva, pa kibra cu e situacion habitual y tradicional, elimina e bareranan structural y garantisa cu niun muher y niun mucha muher ta keda atras. “Innovacion y tecnologia ta brinda oportunidad sin precedente, sinembargo e tendencianan actual ta indica cu e area digital ta ampliando y cu e muhernan ta insuficientemente representa den e camponan di ciencia, tecnologia, ingeniería, matematica y diseño. Esaki ta impidi nan pa desaroya y influi den e desaroyo di innovacion sensibel na genero, cu ta permiti nan logra e beneficionan transforma pa sociedad. Ta vital cu e ideanan y e experiencianan di hende muher influi igual den diseño y aplicacion di innovacion cu ta forma e sociedadnan di futuro,” Ras a finalisa bisando.
