Recientemente nos a tuma nota cu minister di Infrastructura Otmar Oduber, alias e Scorpion Octopus, ta keda defende e proyecto di hotel na Baby Beach. E ta haci mescos cu ta e ta encarga cu Turismo y cu Asuntonan Laboral. Te hasta otro expertonan local el a ataca, mustrando cu ta e 900 cambernan di hotel ey ta e unico solucion pa San Nicolas.
Porcierto hayando “bijval” di hukinan inspera, incluyendo fanaticonan di e partido MEP, sin mira kico den pasado recien parlamentarionan di mesun partido aki a vocifera den prensa local of riba social media riba e topico aki. Na mes momento e minister ta bay enpugna cu su propio vision tempo e tabata forma parti di Gabinete Eman I y II (AVPOR) tocante “All Inclusive”, birando awe 180 grado y papiando otro cos.
Es mas su colega minister di Turismo Dangui Oduber tambe parce di a lubida su criticanan riba Otmar Oduber den pasado, y ta secunda henter e proyecto aki, criticando su propio Tata dor di bisa cu den pasado ningun gobierno no a haci nada pa San Nicolas. Te hasta e Scorpion tabata insinua cu lo tabata tin soborno, chantage etc. e.o. di e hendenan di partido MEP.
Tambe UPP a tuma nota di e comunicado di prensa di San Nicolas Business Association(SNBA) unda cu ta alza e proyecto aki como e unico proyecto pa San Nicolas. Aki tambe parce vision y e capacidad pa “out of the box thinking” a caba. SNBA ta menciona un cantidad di iniciativa cu lo ta den “pipe-line” dependiendo si e hotel bini. Dicon SNBA no a haci esfuerso pa convence gobierno pa duna un aporte na San Nicolas pa tur e iniciativanan cu lo tin den “pipe-line?
Segun nan tin doñonan di cas den Colony y San Nicolas cu kier sa si e hotel grandi ta bin, pa asina nan cuminsa renoba y prepara nan casnan pa bira un RB&B (Airbnb). Un concepto cu hustamente a ricibi masha critica di e minister di Infrastructura, ya cu lo no tin control suficiente riba nan y lo ta trece turista di menos recurso nos isla. Dicon SNBA no por a stimula iniciativanan den cuadro di Boutique Hotels y na mes momento promove y busca incentivanan pa desaroya e Airbnb den Colony y San Nicolas, sin tin nodo di bin cu 900 camber di hotel?
SNBA ta papia tambe cu e hotel lo mester di hopi trahado, pero cu no ta necesario importanan. Un 1000 trahado cu ta move di San Nicolas pa Palm Beach lo haya trabou eynan y kizas lo por busca algun managers for di afo pa “run” e hotel. Pero con ta yena e 1000 of mas puestonan cu ta wordo crea na Palm Beach bek? Lo no mester busca esakinan di afo? Ki beneficionan lo por tin pa e trahadornan aki, banda di cu nan lo ta mas cerca di cas? Nan salarionan lo ta mescos? No por a pensa riba un alternativa pa transporte publico mas barata subsidiando Arubus y creando e concepto di transporte liber?
UPP ta contra construccion di mas camber di hotel na Aruba, tanto pariba como pabou. No por hustifica un notel nobo, djis pasobra ministernan a duna pabou permiso y ta pesey pariba tambe tin di haya. Pa UPP esaki ta falta di vision, mientras parce cu tin panico pa core bin cu un proyecto pura pasbora “the clock is ticking” den e gobernacion aki. Y ta parce que “coute que coute” kier yena saco di algun “sponsornan” cu ta keda misterioso.
UPP ta comparti e preocupacion cu San Nicolas mester di un “boost”, pero esey nos por logra tambe dor di bin cu companianan y industianan cu ta capital intensivo. Alabes haci San Nicolas e “Residentie-stad” di Aruba mescos p.e. Den Haag na Hulanda pa asina por tin un “spinoff-effect” economico eynan y lo nifica un “boost” enorme sin cu mester di importa ni un solo hende. San Nicolas lo tin miles di hende, cu ta gana basta mas di sueldo minimo, ta traha na e banda aki di e isla.
Pa loke ta nos medio ambiente, nos por bisa cu na momento cu nos no sa con pa anda cu nos medio ambiente, particularmente e caracter di esaki, ni e caracter cultural y historico di un sitio, nos por ta haci daño inmenso na nos identidad y na nos beneficionan economico cu por tabata tin.
E maneho espacial y cuido di nos medio ambiente den forma balanza, ta sirbi nos comunidad na dos manera. E ta contribui na conservacion di nos identidad y na mes momento crea un beneficio economico, unda cu turistanan ta bin pa wak buniteza di nos isla. Esun cu ta trece cambio den e parti di espacio y panorama di nos areanan unico, ta mete tambe cu e caracter di un area, manera ta esun di Baby Beach. Hopi interferencia of interferencia robes por cambia nos identidad, como pueblo y como isla. Un bon analisis y assesoramento di un situacion por nifica decisionnan bon y balanza cu ta na beneficio di nos comunidad den su totalidad.
Si un gobierno of un minister ta keda basa su mes unicamente riba un rapport di un “amigo”, ta nifica cu e no ta tene cuenta cu e involvimento social di esnan cu ta biba riba e pais. Aki no por tin e bienestar di pais na pecho. Un grupo chikito aki na Aruba di berdad no ta interesa pa discuti riba e capacidad di carga ni riba diversificacion y mehora calidad di nos turismo.
E modus operandi aki ya Aruba y su pueblo tabata y ta victima di dje, na unda e garantianan na mafiosonan(1986-1989) y e proyectonan di AVPOR(2009/2017) a hiba nos na unda nos ta awe!! Nos no por permiti cu capricho politico y falta di vision, hiba nos pais y nos pueblo mas den un abismo cu nos ta awe caba.
#paracosawor.