Tres persona herida den accidente serio na Boegoeroei

Boegoeroei – Dialuna pa mas o menos 12’or y 30 di marduga, ta sosode un accidente di trafico basta serio na e crusada na altura di Fermin’s Bar, cu urgencia polis y tambe ambulance a bay na e sitio.

Na yegada mesora a pidi pa Materiaalwagen pasobra lo tin hende pega den e auto.

E autonan envolvi tawata un Honda y Nissan Tiida. Ambos a ricibi hopi daño material.

E accidente a sosode pa falta di preferencia.

Materiaalwagen di brandweer a presenta y corta e porta unda tawata tin un dama sinta, net caminda e impacto tawata.

Un total di tres ambulance a presenta pa transporta e tres personanan herida, di cual uno ta poco serio, segun nos a compronde.